OÉ-CUSSE, 13 Agostu 2024 (TATOLI) – Xefe suku Naimeko, Marcos Liu, preokupa ho reabilitasaun estrada husi eis merkadu Tono liga bá sub-rejiaun Oésilo, iha Rejiaun Administrativa Espesiál Oé-Cusse Ambeno (RAEOA), tanba nakonu ho rai-rahun, nune’e afeta ba abitante sira-nia saúde.
Tanba ne’e, líder komunitáriu husu ba autoridade RAEOA atu orienta empreza no Diresaun Rejionál Infraestrutura atu rega estarada kada loron dala ida.
“Estrada ne’e nakonu ho rai-rahun, entaun nia impaktu mai ami komunidade iha suku sira-ne’ebé agora infraestrutura la’o hela hanesan Bobokase, Naimeko no Bobometo, tanba fulan rua ona estrada ne’e paradu, konsikuénsia ba povu nia uma nakonu ho rai-rahun, liuliu afeta ba saúde”, Marcos Liu dehan.
Notísia relevante: ADN orienta Waskita Karya sobu estrada kilómetru 9,5 iha Nítibe-Oésilo
Hanesan autoridade lokál, nia husu autoridade RAEOA atu aselera projetu reabilitasaun Estrada no bainhira tempu udan labele afeta ba inundasaun, tanba bee-dalan barak mak seidauk reabilita.
“Ha’u rekomenda ba Governu atu rega, maske sei iha problema kona-ba obra ne’e, maibé ami persiza rega loroloron, nune’e bele redús rai-rahun. Ida-ne’e mak ha’u rekomenda, liuliu ba autoridade másima iha RAEOA”, nia hato’o.
Iha fatin hanesan, Jestór Sub-rejiaun Pante Makasar, Lourenço da Cunha, hateten bainhira halo konstrusaun estrada nia impaktu ba komunidade, tanba ne’e persiza tau-matan ba ema nia saúde.
“Ita haree estrada husi Tono bá Oésilo ne’e paradu provizoriamente, tanba Governu identifika iha irregularidade, maibé ita haree loroloron movimentu transporte hamosu rai-rahun, nune’e afeta ba komunidade nia saúde. Ita haree uma sira rai-rahun tama to’o laran, tanba estrada nakonu ho rai-rahun no la rega”, nia salienta.
Foto Tatoli/Abílio Elo Nini
Lourenço da Cunha promote katak, iha tempu badak, nia sei hato’o problema ne’e ba autoridade, liuhusi Diresaun Rejionál Infraestrutura atu orienta Departamentu Servisu Água no Saneamentu Oé-Cusse atu rega estrada kada loron dala ida.
Notísia relevante: DRI no ADN fiskaliza uluk projetu 183 molok halo pagamentu
Ho kestaun ne’e, jornalista Tatoli tenta konfirma ho Diretór Rejionál Infraestrutura (DRI), maibé laiha fatin tanba daudaun ne’e hala’o hela serbisu iha Dili no tenta konfirma tan ho parte empreza maibé okupa ho serbisu seluk.
Projetu estrada ne’e nu’udar pakote daruak husi Tono, suku Cunha, bá sub-rejiaun Oésilo. Autoridade RAEOA hatuur fatuk dahuluk iha loron 16 Maiu 2023 no estrada ne’e konstrui husi Waskita Karya ho distánsia kilómetru 18 ho osan millaun $33,9.
Maibé, daudaun ne’e Governu liuhusi Ajénsia Dezenvolvimentu (ADN) hapara provizoriamente obra ne’e, tanba empreza konstrutora la prienxe padraun ba nahe asfaltu ka asphalt.
Notísia relevante: Rogério Lobato preokupa projetu estrada Tono ba Oésilo gasta millaun 33-resin
Jornalista: Abílio Elo Nini
Eeditóra: Maria Auxiliadora
