BOBONARO, 02 setembru 2024 (TATOLI)-Grupu Agrikultór hamutuk 23 iha munisípiu Bobonaro iha tempu badak sei simu mákina agrikultura moderna ne’ebé apoia husi Banku Mundiál liuhosi projetu (SAPIP).
Diretór Servisu Munisipál Agrikultura, Munisípiu Bobonaro, Longuinhos João, informa grupu 23 ne’ebé sai benifisiáriu atu simu mákina hirak-ne’e mai husi suku Leo-Lima, postu administrativu Balibó, suku Manapa, postu administrativu Cailaco no suku Ritabou, postu administrativu Maliana.
Enkuantu mákina ne’ebé sei distribui iha tipu tolu hanesan; hand tratór unidade 23 ne’ebé sei distribui ba kada grupu hetan ida, mákina kuda-hare 46, kada grupu hetan rua no mákina ko’a hare unidade 11 ne’ebé sei distribui grupu rua hetan makina ida.
Notísia relevante: DSMA introdús tékniku habokur-rai ba agrikultór sira iha Holsa-Leolima
“Sasán hirak-ne’e tula ona mai munisípiu, iha tempu badak ita sei fahe ba grupu benifisiáriu sira, depois vizita Santu Padre mak sei fahe,” nia informa ba Jornalista sira, iha sentru Extensaun Agrikultura, Tunubibi, segunda ne’e.
Nia hatutan, molok distribui, kompañia fornesidór sei fasilita formasaun ba grupu benifisiáriu sira atubele halo operasaun ba mákina ne’e ho loloos.
Nia dehan, ho apoia mákina ne’e bele fasilita grupu benifisiáriu implementa projetu HAPAS ho efisiénsia no efetivu liután.
“Ita-nia objetivu fundamentál ne’e atu hasa’e produsaun, ho mákina hirak-ne’e, uluk sira ko’a hare presiza tempu barak, ezemplu ektare ida presiza ema 10 ka 20 lori loron rua ka tolu, mas agora mákina ita sura oras de’it, entaun ita redus númeru ema ne’ebé halo serbisu no redús kustu,” nia katak.
Entretantu, iha 16 novembru 2016, Governu Timor-Leste liuhosi Ministériu Agrikultura no Peska (MAP) selebra akordu ida ho Banku Mundiál hosi kona-bá implementasaun projetu Hasa’e Produtividade Agrikultura Sustentável (HAPAS) iha Timor-Leste.
Projetu ne’e Ministériu Agrikultura no Peska (MAP) ho Banku Mundiál, hahú halo lansamentu iha 29 setembru 2017, munisípiu hitu (7) maka sai alvu iha implementasaun faze dahuluk, hanesan basia idrográfika Be-Lulik, realiza iha munisípiu Ainaro no Covalima, basia idrográfika Loes, realiza iha munisípiu Ermera no Bobonaro, basia idrográfika Raumoco, realiza iha munisípiu Lautem, no basia idrográfika Tono, realiza iha Rejiaun Administrativa Espesiál Oé-Cusse .Ambeno (RAEΟΑ).
Projetu ne’e implementa hosi Ministériu Agrikultura no Peska (MAP) hetan finansiamentu fundu hosi Programa Seguransa Ai-haan no Agrikultura ka Global Agrikultura and Food Security Programe (GAFSP) ho montante millaun $21. Ne’ebé ezekuta mai hosi parseiriu sira iha Banku Mundiál nian, hanesan Organizasaun Sosiedade Sivíl sira, no Organizasaun Nasaun Unida nian ba Ai-haan no Agrikultura (FAO, sigla inglés), ho durasaun tinan lima, hahú 2017 to’o 2022.
Objetivu hosi projetu ne’e, atu hadi’a produtividade agrikultór ki’ik-sira, no fó tulun atu fa’an produtu sira-ne’ebé grupu agrikultór sira prodús, liuhosi planu dezenvolvimentu nian, hanesan atividade pekuária no veterinária, ortikultura no indústria inovativu, ida-neʼebé atu ezekuta iha zona munisípiu 7, Lautem, Ainaro, Covalima, Liquiçá, Ermera, Bobonaro no RAEOA.
Jornalista: Sérgio da Cruz
Editór: Evaristo Soares Martins
