Papa Francisco kumprimenta jornalista sira inklui Timoroan
ROMA, 03 setembru 2024 (TATOLI) – Entre fé no knaar, durante viajen distante ida; Roma no Indonézia, Sua Santidade Papa Francisco kumprimenta jornalista sira hotu – husi plataforma oioin, inklui jornalista Timoroan sira ne’ebé hola parte iha ekipa ne’e.
Jestu umilde ne’e, líder másimu igreja Katóliku ne’e halo, ba profisionál komunikasaun sosiál sira, inklui husi Timor-Leste, hanesan Virginia dos Santos Silva husi RTTL, E.P, Delfim de Oliveira husi GMN, no Filomeno Martins husi Agência Noticiosa de Timor-Leste, I.P (TATOLI, I.P), hafoin oras ida-resin husik hela Aeroportu Internasional Roma, Itália.
Prosesu kumprimenta hahú ho liafuan-badak husi Sua Santidade no akompaña hosi Diretór Sala Imprensa Santa See, Matteo Bruni.
Hafoin kurtina nakloke, Sua Santidade mosu mai ho hamnasa no entusiazmu bo’ot hodi kumprimenta jornalista sira. “Óla, Dom Dia, Óla Bom Dia ba imi hotu.”
“Ha’u hato’o obrigadu ba imi hotu ne’ebé mak mai iha jornada ida-ne’e. Obrigadu ba imi-nia akompañamentu. Obrigadu barak no depois ha’u sei hasoru hikas imi iha jornada naruk ida-ne’e. Ha’u hanoin ida-ne’e mak jornada naruk ne’ebé ha’u hala’o,” Papa Francisco ba jornalista sira hafoin husik hela Aeroportu Internasional Roma iha tuku 5.17 lorokraik, oras Roma, segunda ne’e.
Hafoin ninia espresaun ‘umilde’ no liafuan-badak – husi fuan no hanoin, Papa Francisco hakat kedas ba área Kabina Media hodi kumprimenta jornalista ida-idak, nu’udar jestu proximidade ida entre líder ida ho nia seguidór sira.
Durante kumprimenta, jornalista idaidak kaer-liman ho Amu Papa hodi espresa sira-nia deseju no alegria, perante líder espirituál no mundiál ne’e, iha viajen ne’e. Nu’udar Timoroan husi nasaun ida-ne’ebé mak Amu Papa sei vizita, Jornalista na’in tolu senti kontente no haksolok tebes bainhira rona tradutór introduz sira-nia naran no sira-nia nasaun Timor-Leste ba Papa Francisco.
Papa Francisco kumprimenta no kaer-iman ho jornalista Timoroan na’in tolu – Virginia dos Santos da Silva, Delfim de Oliveira no Filomeno Martins, no sira re’in Sua Santidade nia Kadeli Santu ho entuziasmu no orgullu, nu’udar Timoroan.
Re’in Santu Padre nia Kadeli Santu hanesan jestu ida hodi hatudu ba Sua Santidade nu’udar fiar-na’in Katóliku.
“Kaer liman ho Amu Papa no rein nia Kadeli Santu, ida-ne’e hanesan previlejiu no momentu istóriku bo’ot tebes ba ha’u. Hau fiar katak ida ne’e sei la repete dala ida tan iha ha’u-nia moris tomak,” sentimentu ne’e mosu ha’u-nia fuan, nu’udar jornalista timoroan ida – Filomeno Martins, hafoin rein Sua Santidade nia Kadeli Santu, iha anin no kalohan leten iha viajen Apostólika ne’e ho Sua Santidade.
“Kaer-liman no rein Amu Papa nia Kadeli Santu nu’udar bensaun no grasa ua’in ida ba ha’u, ba ha’u-nia família, no ba ha’u-nia nasaun Timor-Leste,” hanoin ida-ne’ebé mosu iha ha’u-nia neon, hanesan jornalista – husi TATOLI, Ajénsia informasaun ofisiál Estadu, no timoroan ida.
Nune’e mós, Virginia dos Santos, jornalista RTTL, E.P hato’o ninia expresaun alegre hafoin kumprimenta malu ho Papa Francisco, líder espirituál no mundiál. “Ida-ne’e excited (haksolok) los ba ha’u, tanba ha’u reprezenta jornalista feto Timor tomak mai viajen ho Amu Papa.”
“Durante ne’e haree Amu Papa iha televizaun de’it, maibé ohin ami na’in rua hasoru malu empat mata. Ha’u kontente ida luar biasa (estraordináriu). Ha’u kaer nia liman kle’ur uitoan, no ho nia espresaun hamnasa ida-ne’e luar biasa,” Virginia, jornalista husi media ho lema “Roman ba Nasaun” haktuir nia sentimentu.
Alende Jornalista Delfim de Oliveira husi GMN mós hato’o ninia sentimentu haksolok hafoin simu bensaun husi Santu Padre.
“Senti kontente tanba hasoru diretamente no bele kaer-liman ho Papa no hetan bensaun husi Papa,” Jornalista husi media ho lema “Lori Timor ba Mundu” ne’e tenik.
Jornalista hamutuk 85 mak akompaña Amu Papa nia viajen, inklui mos jornalista Timoroan na’in tolu, Indonézia tolu, no singapura na’in rua.
Papa Francisco ho nia delegasaun, inklui jornalista sira to’o iha Aeroportu Internasional Jakarta Soekarno-Hatta iha tuku 11.30 dader, oras Jakarta.
Notísia relevante:Vizita Papa Francisco lori grasa mai Timor-Leste
Jornalista: Filomeno Martins
Editór: Rafael Ximenes de A. Belo
