OÉ-CUSSE, 03 Setembru 2024 (TATOLI) – Projetu reabilitasaun merkadu tradisionál Pune ne’ebé lokaliza iha suku Usitasa’e, sub-rejiaun Oésilo, Rejiaun Administrativa Espesiál Oé-Cusse Ambeno (RAEOA) nia konstrusaun fizika atinje ona 95%.
Diretór empreza Elo Manu, Unpessoal Lda, Ananias do Carmo Elo, promete katak sei finaliza obra ne’e iha Outubru 2024, tanba durante ne’e negosiante sira uza de’it dalan-ninin hodi fa’an sasán.
“Falta item rua de’it atu kompleta ba 100%. Ida halo uma ba fa’an sasán iha laran ne’e hela pinta de’it, ida fali mak merkadu terbuka ka uma uma kompelta kedas no meza no kadeira, ne’e falta odamatan ba meza fa’an modo nian. Ha’u garante katak tama ba Outubru nia laran ami bele entrega ona ba autoridade RAEOA hodi bele utiliza”, Ananias Elo dehan ba Tatoli iha suku Usitasa’e.
Notísia relevante: Autoridade RAEOA aloka rihun $306-resin reabilita merkadu tradisionál Pune
Xefe suku Usitasa’e, Tomás Ulan Colo, espera katak empreza bele aselera obra ne’e, tanba nia kontratu tinan ida tomak no reabilitasaun ne’e halo negosiante sira utiliza de’it ai-mahon no estrada ninin sai fatin ba fa’an sasán.
“Kontratu sei to’o Novembru, maibé ha’u mak ezije kompañia atu halais serbisu molok tempu udan, tanba durante ne’e negosiante sira mai fa’an sasán uza de’it via públika no ai-mahon. Tanna ne’e, ha’u ezije ba kompañia antes Outubru 2024 ne’e, komersiante sira tenke tama ona iha merkadu laran”, nia husu.
Tuir observasaun autoridade lokál ne’e, obra ne’e kompleta kedan ho saneamentu ijiéniku hanesan, hariis fatin, fatin lixu no bee-moos.
Notísia relevante: Xefe suku Usitasa’e propoin ba autoridade RAEOA atu muda sede suku
Projetu ne’e ezekuta husi empreza Elo Manu Unipessoal Lda ho valór kontratu hamutuk $306,226.94, ho durasaun serbisu tinan ida, hahú iha 10 Novembru 2023 no sei finaliza iha 10 Novembru 2024.
Jornalista: Abílio Elo Nini
Editora: Maria Auxiliadora
