Papa Francisco: Diálogu inter-relijiozu mak xave ba promosaun respeitu malu
JAKARTA, 04 september 2024 (TATOLI) – Papa Francisco iha ninia vizita loron daruak iha Jakarta Indonézia husu ba líder relijiozu, no líder polítiku sira atu promove diálogu inter-relijiaun hodi haburas moris hamutuk iha armonia no respeita ba direitu umanu, inklui mós grupu minoria Kristaun iha Indonézia.
Iha ninia diskuru bainhira hasoru malu ho líder polítiku, sosiedade sívil no korpu diplomátiku sira, Papa Francisco hato’o katak Igreja Katólika iha dezeju boot hodi promove diálogu inter-relijiozu hodi haburas dame ho sentidu ida atu hakotu dezekilibiru no sofrementu ne’ebé mak sei akontese hela iha rai balun.
Perante autoridade besik-300, inklui reprezentante sosiedade sívil, korpu diplomátiku sira iha Palásiu Prezidensiál Istana Merdeka, Papa Francisco komenta kona-ba eforsu Indonézia ne’ebé kontinua mantein atu moris iha armonia iha sosidade ida ho etnia, kultura no relijiaun oioin.
Nu’udar nasaun ne’ebé mak ho nia populsaun 229 miliaun muzulmanu (87%), Indonézia hatudu ba Santu Padre oportunidade ida hodi hametin kolaborasaun no koperasaun di’ak entre komunidade muzulmanu no Katóliku sira. Entretantu, husi populasaun Indonézia 275 miliaun, ema pursentu tolu mak moris ho fiar Katóliku iha Indonézia.
Ho nun’e vizita Santu Padre nian ba nasaun ho maioria populasaun muzulmanu ne’e atu reafirma hikas kompromisu Vatikanu nian iha promosaun armonia moris hamutuk liuhusi inter-diálogu entre relijiaun rua.
Alein destaka importánsia husi diálogu inter-relijiaun, Santu Padre mós espresa ninia preokupasaun kona-ba diversidade Indonézia nian ne’ebé mak bele sai fatin ba konflitu.
Nune’e, nia husu atu Indonézia mantein nafatin balansu iha multiplisidade kultura no diferensa vizaun ideolojikál hodi hametin unidade.
Sua Santidade reafirma hikas ba Prezidente Widodo, kompromisu igreja Katólika nian hodi haburas no habelar inter-dialogu referidu.
Ho kompromisu Igreja Katólika ni’an ne’e, sidadaun Indonézia barak espera katak ho vizita Santu Padre bele enkorja Indonézia hodi hakotu intoleránsia no diskriminasaun hasoru grupu minoria, liu-liu Kristaun sira.
Papa husu ba líder polítiku Indonézia nian hodi respeita direitu umanu no direitu polítika sidadaun hotu nian no enkoraja inter-diálogu hodi haburas unidade, toleránsia no respeitu malu.
Notísia relevante:Amu Papa hakarak ‘relijiozu’ Indonézia sai testemuña ba Resurreisaun
Jornalista: Filomeno Martins
Editór:Rafael Ximenes de A. Belo
