Sientista Shapiro aprezenta reziliénsia agrikultura agrofloresta no seguransa ai-han ba estudante UCT
DILI, 25 Agostu 2026 (TATOLI)—Sientista Planta Internasionál, Howard-Yana Shapiro, Tersa ne’e, aprezenta matéria kona-ba “Agriculture Resilience Agroforestri and Food Security” ba estudante sira husi Universidade Katólika Timorense (UCT) iha ámbitu simeira siénsia no dezenvolvimentu Sci-Tech Expo 2026.
Iha aprezentasaun, Howard-Yana Shapiro aprezenta kona-ba problema kompleksu no sistemátiku ne’ebé envolve hamlaha króniku, má-nutrisaun, mudansa klimátika no seguransa ai-han.
Shapiro dehan stunting la’ós de’it problema kona-ba altura ka todan labarik, maibé mós bele afeta dezenvolvimentu sistema nervu, tanba falta mikronutriente, no ikusmai iha impaktu ba dezenvolvimentu umanu no produtividade.
Atu rezolve problema hamlaha króniku no malá-nutrisaun iha Timor-Leste, Sientista Planta Internasionál dehan presiza kolaborasaun entre instituisaun sira.
“Ida-ne’e hateten katak universidade, setór saúde, Ministériu Agrikultura no instituisaun relevante sira tenke servisu hamutuk atu dezenvolve solusaun ba problema real ne’ebé daudaun ne’e Governu Timor-Leste esforsu atu halakon liuliu kona-ba stungting”, nia ba jornalista sira, iha salaun UCT.
Biban ne’e, nia fó hanoin atu Timor-Leste investe ho didi’ak iha setór agrikultura no rekursu naturál atu garante kresimentu ekonomia no moris di’ak ba jerasaun futuru.
Nune’e, nia subliña Timor-Leste iha ambiente naturál no rekursu ne’ebé importante, ne’ebé presiza kuidadu no uza ho responsabilidade atu bele fó benefísiu ba gerasaun sira agora no ba sira-ne’ebé tuirmai.
“Timor-Leste presiza konsidera ho di’ak rekursu naturál no potensialidade ne’ebé nasaun iha, liliu iha prosesu dezenvolvimentu nasionál. Hakarak Timor-Leste bele halo di’ak liután saida mak ita-boot sira aprende ona ne’e, no tenke kuidadu saida mak agora Timor-Leste iha ne’e,” nia sujere.
Nia akresenta reziliénsia iha setór agrofloresta no seguransa ai-han konsidera importante atu ajuda komunidade sira enfrenta impaktu hosi mudansa klimátika no dezafiu iha produsaun ai-han.
Sientista Howard hatutan, melloramentu jenétiku ai-horis la’ós de’it atu aumenta produtividade, maibé mós atu hasa’e valór nutrisionál, rezisténsia ba moras no insetu, no rezisténsia ba kondisaun ambientál.
Jornalista: Osória Marques
Editór: Xisto Freitas da Piedade
