Sarani sira hahú la’o-ain ba Tasi-Tolu
DILI, 10 setembru (TATOLI) — Sarani hosi kapitál Dili no munisípiu sira hahú la’o-ain ba área Tasi-Tolu ne’ebé prezide husi Papa Francisco iha tuku 16:00.
“Agora ami hahú la’o-ain ba Tasi-Tolu atu partisipa misa, tanba ta’uk fatin laiha. Ami ba sedu tanba misa ne’e importante,” Joana de Jesus informa ba TATOLI iha área ponte Komoro III, Dili, tersa ne’e.
Joana sente kontente atu partisipa misa solene ne’ebé sei dirije husi Papa Francisco iha Tasi Tolu, iha tuku 16:00.
“Hei ita la’o lalais ona, ko’alia lalais ba Jana, ba Tasi Tolu ne’e dook ne’e, ita la’o dadeer mak di’ak, tanba orsida rai manas ne’e ita la’o ladún di’ak,” Cipriana dos Santos ne’ebé husu Joana de Jesus atu hakotu ona entrevista ne’e.
Tuir observasaun Agência TATOLI iha área Comoro nian nota katak, sarani hahú la’o-ain iha tuku 5:00 dadeersan, lori ho hahán no bee-moos. Hahán ne’e komposta hosi katupa, biskuit no bee.
Purtantu sarani sira husi lidun sidade Dili maioria ho kamizola “Que a vossa fé seja a vossa cultura.
Entretantu husi munisípiu sira hanesan Viqueque hahú tama dadeer ne’e no oras ne’e hosi parte Liquiçá, Bobonaro nian iha dalan atu mai Tasi-Tolu.
Observasaun seluk ne’ebé Agência TATOLI katak, husi parte Igreja nian husi munisípiu ne’ebé antes ne’e tama ona Dili hahú organiza transposrta sarani sira ho karreta ba hatún iha área estátua Nicolau Lobato.
Husi sentru pastoral Surik Mas no sentru pastorál Bairru-Pité oras ne’e hahú mobile sarani sira aranka ba Tasi-Tolu.
Viajen pastorál ne’e Papa Francico hahú uluk husi Indonézia, Papua Nova-Guiné, Timor-Leste no ikus liu iha Singapura.
Iha loron dahuluk, sarani rihun ba rihun simu Papa Francisco forma husi aeroprtu Nicolau, estátua Nicolau Lobato, eskola 30 agostu, ponte CPLP, aéra Plaza nian, eis merkadu Komoro, Fatuhada, Kampu Alor, Palapasso, Farol to’o Motael.
Hakarak informa katak, dadaersan ne’e Papa Francisco sei hala’o vizita ba Asosiasi Lembaga Misionari Awam (ALMA).
Jornalista: Sérgio da Cruz
Editór: Evaristo Soares Martins
