DILI, 16 setembru 2024 (TATOLI)—Ministériu Edukasaun (ME) aprova ona eskola tolu nia lisensa operasionál no publika ona.
“Pedidu foun husi eskola tolu tuir ona avaliasaun rigór, sira hetan ona aprovasaun lisensamentu operasionál no foin daudaun ne’e publika ona iha Jornál Repúblika,” Koordenadór Gabinete Avaliasaun Lisensiamentu no Akreditasaun (GALA) iha ME, António Tomas Maia, hateten, iha ninia knaar fatin, Vila-Verde, segunda ne’e.
Eskola tolu ne’ebé iha hotu Dili kompostu husi eskola rua privadu no internasionál ida ho nível eskolaridade.
“Ita tenke halo aplikasaun ba Eskola Internasionál Pelican, hahú husi pre-eskolár to’o ensinu sekundáriu, no ikus sira prense duni. Ita atribui ona prosesu lisensiamentu ba sira, nomós iha eskola privadu ida mak Eskola São Mateus iha Ailook-laran, ida-ne’e ita atribui ba terseiru siklu, nomós ba Eskola Colégio Regina, ita atribui ba pré-eskolár no ba ensinu náziku nomós ida-ne’e ba eskola sira iha munisípiu Dili,” nia akresenta.
Notísia relevante : Relasaun pedagójika ho alunu sira vale Prémiu Prinseza Maha Chakri ba Filomena Costa
Dekretu Lei númeru 8/2016, ne’ebé mak regula kona-ba prosesu lisensiamentu nian, mensiona katak prosesu hotu hahú iha inisíu tinan ida-ne’e, fulan janeiru to’o juñu, no pedidu ida-ne’e GALA simu iha fulan marsu.
“Ita konklui rezultadu iha fulan-jullu, ita fó sai no públika sai iha Jornál Repúblika. Ita notifika no entrega ona, maibé kona-ba sertifikadu ita sei iha faze elaborasaun, bainhira konklui maka foin bele atribui ba sira. Importante mak diploma ministeriál ne’ebé mak Ministériu aprova ona no publika ona,” nia tenik.
Jornalista : Osória Marques
Editora : Julia Chatarina
