DILI, 19 setembru 2024 (TATOLI)—Projetu komunitáriu ne’ebé inisia iha tinan 2021 ba konstrusaun eskola 202 pre-eskolár to’o ensinu sekundáriu iha territóriu Timor sei konklui iha tinan ne’e.
Husi eskola hirak ne’e, eskola 188 finaliza ona iha tinan 2022 to’o 2023 no hela 14 mak sei finaliza iha tinan ne’e.
“Projetu komunitáriu ba Orsamentu Jerál Estadu (OJE) 2021 nia kuaze maioria finalizadu, iha projetu 14 mak iha momentu ne’ebá atrazu ne’e agora atinje ona progresu maioria 90%, signifika projeitu hirak ne’e ita sei konklui iha tinan ne’e. Progresu fíziku 90% ne’e falta 10% ona atu finaliza no entrega ba Ministériu Edukasaun atu utiliza. Kalen taka hotu ona, odamatan janela mós loos ona, hein hadi’a nia laran hodi prense karteira eskolár,” Diretór Diresaun Nasionál Infraestrutura no Edukativu iha Ministériu Edukasaun (ME), Hélio Lopes, informa iha ninia knaar fatin, Vila-Verde, kinta ne’e.
Notísia relevante : Servisu Edukasaun Viqueque inaugura projetu komunitáriu iha Eskola ESJ Calixa Viqueque
Konstrusaun tarde tanba kestaun dalan a’at no badaen balun abandona serbisu.
“Tanba grupu sira la konsege organiza, entaun ita esforsu no nafatin fó asisténsia tanba iha tinan ida-ne’e nia laran konsege finaliza ona no hein tempu tuir mai ita utiliza ona,” nia akresenta.
Eskola 14 ne’ebé sei finaliza iha tinan ne’e iha munisípiu Baucau, Viqueque, Ainaro, Bobonaro no Same.
ME aloka orsamentu millaun $10-resin ba projetu komunitáriu ba konstrusaun eskola hamutuk 116 ne’ebé inisia iha tinan 2023, ninia progresu atuál atinje ona 66%.
“Signifika ita esforsu tinan ida-ne’e mós bele konklui hotu no projetu ne’e jere husi grupu komunitáriu ne’ebé selebra kontratu ho Ministériu Edukasaun iha tempu liubá. Inklui Eskola 05 maiu maibé konstrusaun eskola referidu paradu tanba kapasidade finanseiru husi kontratór, entaun hirak ne’e prejudika Ministériu. Ami fó ona notifikasaun ikus katak to’o novembru mak la konklui Ministériu Edukasaun sei prosesa tuir regra kontratu ne’ebé estabelese,” nia esplika.
Aleinde ne’e, projeitu foun hamutuk 21 ne’ebé inisia iha tinan 2024, daudaun ne’e iha ona prosesu aprovizionamentu, balun konklui ona prosesu aprovizionamentu no hein atu kontratasaun.
“Ha’u hanoin iha tempu badak ita sei iha kontratasaun, depende ba prosesu aprovizionamentu ne’ebé inisia husi Diresaun Nasionál Aprovizionamentu Ministériu Edukasaun. Ita sei implementa iha tinan ida-ne’e, maski tarde maibé tenke implementa tanba ida-ne’e orsamentu tinan ida-ne’e nian,” Diretór katak.
Jornalista : Osóra Marques
Editora : Julia Chatarina
