DILI, 25 setembru 2024 (TATOLI) – Komisáriu Komisaun Anti-Korrupasaun (CAC, sigla portugés), Rui Pereira dos Santos, hateten CAC buka tuir hela karreta Estadu ne’ebé sirkula iha Atambua, perante oras serbisu.
Ruie rekorda, iha segunda (23/9) foin lalais ne’e, karreta Estadu barak mak halo movimentu iha Atambua, iha loja Gajamada iha oras servisu no sai virál iha facebook.
“Karreta sira-ita identifikadu. Ami-nia unidade prevensaun no investigasaun agora rekolla hela dadus no informasaun no ita mós halo ona komunikasaun ho instituisaun ka ministériu kona-ba sapa matríkula husi karreta. Ita rekolla hela informasaun hodi husu objetivu instituisaun ba utilizasaun karreta Estadu iha Atambua. Se ita hetan informasaun katak sira utiliza sala karreta Estadu sira ne’e, entaun ita halo prosesu ba sira bazeia ba artigu rua pekulatu no pekulatu uzu tuir Kódigu Penal Timor-Leste”, Rui dos Santos hateten ba jornalista iha nia kna’ar fatin CAC Farol, kuarta, ohin.
Komisáriu Rui realsa, CAC mós simu informasaun iha fulan kotuk liuba katak iha funsionáriu iha instituisaun balun dala ruma lori Estadu nia naran hodi ba para iha otel sira iha Atambua.
“Ema balun kestiona, balun lori karreta Estadu ba para iha otel, informasaun sira ne’e ami konsidera hanesan informasaun. Ita labele naran duun ema arbiru, maibé liuhusi prosesu ida mak foin identifika, nia ne’e sala ka los”, nia adianta.
Nia dehan, karreta Estadu sira ne’ebé dala barak halo movimentu iha Atambua ne’e dala ruma funsionáriu MNEK hanesan Konsul Atambua no Kupang inklui funsionáriu sira husi Dili ba halo serbisu iha RAEOA, bainhira to’o iha fronteira dala ruma fronteira taka ona, entaun pasiénsia tenke fila ba toba iha Atambua molok fila fali mai fronteira hodi mai Dili.
“Kuandu sira iha Atambua, entaun tenke liuhusi Gajamada para troka osan hodi ba han, hemu no hola buat ruma hodi uza ba nia nesesidade. Ne’ebé dala ruma ita labele hanoin negativu de’it “, nia konklui.
Jornalista : Natalino Costa
Editór : Zezito Silva
