Ministru Hornai kompromete aplika zero toleránsia ba funsionáriu Notaridu sai ‘Broker’
DILI, 26 setembru 2024 (TATOLI) – Ministru Justisa Sergio Hornai, hateten sei la tolera funsionáriu Notaridu ne’ebé sai fali broker iha servisu atendimentu diáriu iha Servisu Rejistu Notaridu.
“Ha’u hateten fila-fila, ha’u laiha fatin para atu fó ba se de’it ne’ebé servisu la tuir dalan”, Sergio Hornai hateten, ba jornalista iha nia kna’ar fatin Colmera, kinta, ohin.
Ministru husu ba públiku, partikularmente parseiru hotu, atu tau matan ba servisu funsionáriu sira iha Notariadu liga ho atendimentu loroloron, hodi mellora di’ak liután servisu Notariadu nian.
“Ha’u husu ba ita-nia parseiru sira, midia komunikasaun no sosiadade sira hotu para bele kontribui buat di’ak, kuandu hetan funsionáriu Notariadu mak halo atendimentu ladún di’ak, halo fali buat seluk, favor fó hateten atu toma kedan medida. Ita la admite, Ita hakarak buka solusaun ka fó buat ida terbaik ba ita-nia sosiadade”, nia adianta.
Iha sorin seluk, Diretór Jerál Servisu Rejistu Notariado, Agostinho Gonçalves Viera, hateten durante ne’e nunka simu keixa husi sidadaun katak iha funsionáriu Notariadu sai fali broker ba atendimentu Pasaporte, Billete Identidade, Sertidaun Moris no Rejistu Kriminál.
“Keixa ne’ebé dehan funsionáriu Notariadu sai broker durante ne’e laiha, maibé ha’u rona informasaun katak iha funsionáriu Notariadu ida sai fali Broker ba atendimentu Pasaporte, maibé ida-ne’e laiha”, nia dehan.
Agostinho defende, broker ne’e dala ruma ema husi liur mak sai broker, maibé funsionáriu Notaridu ne’e laiha.
“Kuandu ami detekta katak iha funsionáriu Notariadu mak sai broker, ami sei foti medida hasoru nia, bele fó sansaun disiplinár, karik grave bele hasai nia. Durante ne’e ami buka tuir hela funsionáriu Notariadu ne’ebé deskonfia sai broker, maibe laiha, tanba ne’e, ha’u atu dehan ema ne’ebé sai broker ne’e laos husi Notaridu, maibé ema sira ne’ebé husi liur mai trata dokumentu iha ne’e mak sai fali broker, funsionáriu Notariadu ne’e laiha”, nia konklui.
Jornalista: Natalino Costa
Editór : Zezito Silva
