DILI, 27 setembru (TATOLI)–Diretór Jerál Floresta, Kafé no Planta Industriál iha Ministériu Agrikultura, Pekuária, Peska no Floresta, Raimundo Mau, hateten atu redús sunu rai arbiru ne’e presiza sidadaun sira-nia konsiénsia atu salva guarda ambiente.
“Konsiénsia sidadaun mukit la halimar. Ikus-ikus ne’e, ita haree iha Lahane, komunidade redús ona sunu-rai kompara ho tinan anteriór sira. Ida-ne’e hatudu ita-nia aproximansaun sira uitoan-uitoan fanu ema-nia konsiénsia. Ita hakarak ema kontribui. Sidadaun hotu-hotu iha responsbilidade atu salva guarda ninia ambiente moris ne’e,” Diretór Jerál ne’e hateten ba Agência Tatoli, sesta ne’e.
Diresaun floresta kontinua aproxima ema sira-ne’e liuhusi autoridade lokál hanesan xefe suku sira, hodi halo sensibilizasaun ba ema sira-ne’e atu labele kontinua sunu rai arbiru iha tempu bailoron.
“Se hakarak sunu tenke halo ahi dalak, maibé nia xave mak konsiénsia individu sidadaun timorense ne’e obrigatóriu. Ita-nia guarda koopera ho autoridade suku nian, kontinua habelar informasaun kona-ba perigu kona-ba sunu rai arbiru ne’e,” nia dehan.
Nia esplika, guarda floresta númeru limitadu tanba iha pesoál ida ka rua mak haree lisuk postu administrativu ida maibé ida-ne’e la’ós sai kestaun.
Guarda floresta la’ós ema-ne’ebé hamate ahi maibé sira ba fasilita komunidade no autoridade suku atu kontribui labele sunu-rai.
“Sira fahe informasaun ba ema hotu atu labele sunu rai, halo toos karik tenke kuidadu. Ita halo brosur no pamfletu no mós liuhusi meiu komunikasaun sosiál hodi habelar informasaun,” nia dehan.
Nia husu ba timoroan hotu-hotu ne’ebé hela besik halo toos ruma atu kuda rai besik iha ai-laran sira-ne’e karik, halo ahi dalan atu ahi labele da’et ba iha área la interrese sunu ka atu prezerva.
Nia apela ba sidadaun sira la’o ho motor no karreta karik, labele fuma no so’e sigaru latun ba iha ai-laran ka estrada ninin, tanba ahi han ho lais loos iha tempu bailoron.
Niainia dezvantajen boot ne’e afeta ba iha komunidade ne’ebé hela besik estrada ninin ka ai-laran tanba sunu rai ne’e bele halo rai sai molik liután no nia biodiversidade sira.
“Ita hakarak ita-nia topografia ne’e nia oin kaber, ita lakohi haree topografia ho oin xokolate no metan, ne’e ita lahatudu ita nia imajen Estadu la di’ak no nasaun ida-ne’ebé la hadomi natureza. Ita tenke muda hanoin no hahalok,” nia dehan.
Jornalista : Jesuína Xavier
Editór : Cancio Ximenes
