DILI, 30 setembru 2024 (TATOLI)—Sekretáriu Estadu Arte no Kultura (SEAK), Jorge Soares Cristovão, husu ba família vítima ahi-han uma-lisan hamutuk 12 iha aldeia Maukale, suku Gariuai, postu administrativu Baucau Vila, munisípiu Baucau, hodi prepara relatóriu hodi hetan apoiu husi Governu.
Uma-Lisan 12 ne’ebé ahi-han mutuk ne’e pertense ba knua tolu hanesan Guileu, Kai-Ono no Bercoli.
“Depois ahi-han uma-lisan iha meudia ne’e, iha lorokraik, ha’u haruka ami-nia ekipa ida tun ba identifika no koordena tiha kedas ho parte família sira iha ne’ebá. Ami-nia dever mak tem que ser ba koordena nafatin, maibé agora família vítima sira mak tem que ser hakerek relatóriu ida mai, ho kronolojia loloos, katak ahi-han ho kondisaun hanesan ne’ebé, tanba sasán lulik balun ne’ebé mak ami-nia ekipa tun bá identifika katak hetan estragu hotu. Tanba ida-ne’e mak iha hela faze ida koordenasaun ho família atu haree, depois oinsá mak ba oin Governu bele apoiu hodi fasilita buat balun ba família, mais atu hateten katak ida-ne’e familia mak tem que ser mantein inisiativa atu depois Governu haree inisiativa ruma hodi ajuda,” Sekretáriu Estadu relata iha Seroja Comoro, segunda ne’e.
Notísia relevante : Inséndiu estraga uma-lisan 12 iha Gariuai
Aleinde ne’e, akontese mós iha postu administrativu Quelicai iha loron hanesan.
“Iha Baucau la’ós ida-ne’e de’it, iha suku ida iha Quelicai hetan mós estragu ahi-han iha loron hanesan hotu, no ekipa tun halo verifikasaun no koordena ho parte família no depois ida-ne’e ami hein hela saida mak família atu hato’o fali mai Governu atu Governu halo asaun ruma ba ida-ne’e,” nia akresenta.
Tanba ne’e, governante ne’e husu ba família vítima sira atu nafatin koordena mós ho autoridade lokál nune’e bele pasa relatóriu mai to’o Governu.
“Relatóriu seidauk to’o mai, tanba uma-lisan ne’e ahi foin han loron hirak liubá, agora família sei haree no identifika hotu. Ami husu atu família sira nafatin koordena ho autoridade lokál sira liu-liu sefe suku no xefe aldeia, nune’e bele pasa relatóriu ida-ne’e ba Governu liuhusi Sekretáriu Estadu depois ami sei haree ida-ne’e,” Sekretáriu Estadu tenik.
SEAK seidauk hatene apoiu saida mak Governu sei atribui ba família vítima tanba presiza levantamentu detalladu.
“Ami sei apoiu ba sira ein termu saida ne’e ita seidauk hatene, tanba ami presiza haree lai oinsá mak atu haree ida-ne’e tanba ida-ne’e dezastre ne’ebé mak ahi-han uma-lisan ne’e,” nia katak.
Jornalista : Osória Marques
Editora : Julia Chatarina
