DILI, 02 outubro 2024 (TATOLI) – Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Domingos Raul ‘Falur Rate Laek’, hateten membru F-FDTL no PNTL ne’ebé hola parte iha ekipa forsa tarrefa konjunta ‘Pombu Mutin’ hakarak hamutuk hodi matein seguransa iha territóriu nasionál hodi garante estabilidade ba povu no nasaun.
“Ohin ami halo enkontru avaliasaun ba servisu ekipa konjunta forsa ‘’Pombu Mutin’’. Operasaun Pombu Mutin ne’e sei ba oin nafatin”, Falur Rate Laek, dehan ba jornalista sira hafoin remata enkontru avaliasaun ba vizita Papa mai Timor-Leste. Reuniaun ne’e halao iha Sentru Formasaun Polísia (CFP, sigla portugés) Comoro, kuarta, ohin.
Nia dehan, Komandu F-FDTL no PNTL sei hamutuk hodi hadia mekanizmu operasaun sira, atu ba oin bele garante seguransa ba povu no nasaun ho di’ak liután.
“Ohin ami fó rekomendasaun sira liuliu ba komandante munsipiu sira atu haree no estuda rekomendasaun sira ne’e, karik buat balun mak ita presiza hadia, entaun sira halo pareser mai, ami rua Komandante Jerál PNTL asina atu ita bele hadia mekazimu operasaun sira iha terenu hodi metin liután”, nia informa.
Falur afirma, F-FDTL no PNTL ne’e sei kontinua hamutuk hodi fó seguransa ba povu no nasaun.
“Nasaun no povu ne’e presiza F-FDTL no PNTL, maske instituisaun rua ne’e enfreta dezafiu maibé instituisaun rua ne’e sei hamutuk hodi fó seguransa ba povu no nasaun ida-ne’e”, nia konklui.
Jornalista: Natalino Costa
Editór : Zezito Silva
