Hetan aprovasaun, suku 11 no aldeia 82 iha Oé-Cusse sei hakat ba eleisaun
OÉ-CUSSE, 04 Outubru 2024 (TATOLI) – Iha konsulta finál ba kriasaun suku no aldeia foun iha Rejiaun Administrativa Espesiál Oé-Cusse Ambeno (RAEOA) hetan ona aprovasaun husi entidade sira, tanba ne’e suku 11 ho nia aldeia 82 sei hakat ba eleisaun.
Suku foun 11 mak iha sub-rejiaun Pante Makasar, iha suku Costa sei kria suku rua Monemeko no Kutete, Cunha kria suku rua mak Maunaebeno no Cunha B, Naimeko kria tan suku ida mak Naimeko B, Taiboko hamosu tan suku ida mak Taiboko B.
Notísia relevante: Autoridade RAEOA halo konsulta finál ba kriasaun suku no aldeia foun
Iha sub-rejiaun Oésilo, suku Bobometo hamosu suku rua Bobo-Ufe no Bobomanat. Iha sub-rejiaun Pássabe, suku Abani estabele tan suku rua mak Haemnanu no Bankeko no iha sub-rejiaun Nítibe, suku Lela-Ufe kria suku ida mak Hao-Ufe.
“Ohin ita finaliza ona [konsulta finál no] aprovahusi entidade hotu katak suku 11 ne’e mak prepara atu sai suku no kompete iha eleisaun suku atu hili konsellu suku foun idak-idak no aldeia foun 82”, Sekretáriu Rejionál Administrasaun, André La’o, dehan iha otél Ambeno, ohin.
Nia informa katak iha semináriu nasionál konfirma mós kona-ba territóriu suku no aldeia foun sira, maibé laiha problema liuliu ba baliza suku, kultura, territóriu inklui rekursu naturál sira iha suku.
“Hahú ohin, komisaun nafatin hala’o serbisu, prepara proposta finál ba Prezidente Autoridade RAEOA hodi hato’o ba Primeiru- Ministru no MAE atu prepara eleisaun suku. Ne’ebé ami esforsa semana oin bele entrega ona tanba tempu mós la biban, nune’e nivel altu deside bele tinan ne’e partisipa eleisaun”, nia hateten.
Notísia relevante: Profíl suku pilotu Kutete Oé-Cusse
Xefe Unidade Koordenasaun Servisu Administrasaun RAEOA no Ataúro, Sebastião Perreira, informa to’o prezente data, Oé-Cusse nia proposta atu harii suku foun seidauk tama iha nivel nasionál.
“Tan ne’e sei hakarak harii tenke aselera prosesu, nune’e iha nivel nasionál bele tetu proposta ne’ebé agora aprova ona iha diskusaun públika ne’e. Prosesu atu harii suku no aldeia foun importante mak tenke iha vontade populár. Ohin iha semináriu ne’e ita akompaña, ema iha duni entuziazmu atu harii tan suku no aldeia. Ida-ne’e mak importante para depois harii tiha suku labele mosu tan problema”, dehan.
Tuir planu, iha tinan ne’e, sei iha eleisaun ba suku sira-ne’ebé nia proposta iha ona Governu no agora depende mós ba iha preparasaun bele akontese iha Outubru to’o Novembru 2024.
“Ita hein de’it, maibé RAEOA ha’u seidauk bele garante, tanba tarde hatama proposta ba iha nasionál, tan ne’e ohin ha’u informa autoridade sira tenki aselera proposta ne’e ba iha nivel nasionál”, nia afirma.
Notísia relevante: Autoridade RAEOA prioriza asuntu estabelesimentu suku foun iha Oé-Cusse
Bazeia ba dadus, iha Oé-Cusse Ambeno totál suku ne’ebé eziste ona hamutuk 18, aldeia 63 no sub-rejiaun haat mak hanesan Oésilo, Pássabe, Nítibe no Pante Makasar.
Jornalista: Abílio Elo Nini
Editora: Maria Auxiliadora
