DILI, 13 novembru 2024 (TATOLI) – Primeiru-Ministru (PM), Kay Rala Xanana Gusmão, rejeita deklarasaun husi deputadu sira iha Parlamentu Nasionál kona-ba nia asesór simu saláriu kada fulan ho montante kada-fulan rihun $25.
“Husu ba deputadu ne’ebé dehan katak iha asesór iha Gabinete Primeiru-Ministru manán osan kada fulan rihun $25 fó hela naran mai-ba, karik iha asesór ruma iha Governu tomak kada-fulan manán rihun $25, favór ida fó hela mai ba sira nia naran, nune’e ami bele duni-sai tiha,” Xefe Governu dehan iha Parlamentu Nasionál durante ámbitu debate Orsamentu Jerál Estadu (OJE) 2025 iha faze espesialidade, kuarta ne’e.
Xefe Governu hato’o nia pozisaun ne’e hodi responde ba Deputada Bankada FRETILIN, Lidia Norberta dos Santos Martins ne’ebé kestiona maka’as kona-ba asesór iha Governu dasia ne’ebé simu salariu to’o rihun kada fulan $25 .
“Primeiru-Ministru tuir informasaun balun ami hetan katak asesór balun iha ita nia Governu kada fulan manán rihun $25, ida-ne’e ami reklama la’ós reklama ba ami nia aan, maibé ida ne’e orsamentu Estadu nian ita hotu tenke hatene kona-ba ida-ne’e, ita tenke gasta ho kuidadu osan povu nian, fundu mina rai atu ramata ona ida ne’e mak ami kestiona,” katak Deputada Lidia.
Iha fatin hanesan, Deputadu Bankada FRETILIN, Antonino Bianco, hateten Dekretu-Lei ne’ebé halo hodi fó biban ba asesór sira simu saláriu boot la’ós VIII Governu Konstitusionál mak halo maibé iha kedan IV Governu Konstitusionál
“Ha’u atu sita katak, Dekretu-Lei ne’ebé estabelese dehan asesór prinsipál sira simu saláriu boot la’ós iha VIII Governu nia tempu, maibé iha kedan ita-boot sira nia Governasaun ida uluk, ne’e se mak sala, Dekretu-Lei ne’e mak viola Lei numeru 07/2007, ida ne’e mak ami fó hanoin tempu ona ba ita atu muda asesór sira ne’ebé simu saláriu boot ne’e,” deputadu Antonino tenik.
Entretantu, Deputadu Bankada KHUNTO, Luis Roberto, hateten, bainhira instituisaun se de’it iha ema ruma nia saláriu boot liu Prezidente Repúblika tenke halo reforma totál.
“Ba instituisaun se de’it, iha ema ruma nia saláriu boot liu Prezidente Repúblika tenke halo reforma totál, ita hamutuk hadi’a atu iha balansu, nune’e ita labele kria konfuzaun iha forum polítika ida ne’e,” Deputadu Luis Roberto hateten.
Jornalista: Hortencio Sanchez
Editór: Florencio Miranda Ximenes
