DILI, 19 novembru 2024 (TATOLI)–Diretora Nasionál Edukasaun no Promosaun Saúde iha Ministériu Saúde, Emilia de Jesus Mendonça, husu autoridade komunitaria no komunidade hotu atu halo limpeza semana ida dala ida atu evita transmisaun moras dengue iha tempu udan.
“Ita ko’alia kona-ba sintina, ita mós tenke ko’alia kona-ba prevensaun moras sira-ne’ebé potensia ho udan monu-rai hanesan moras dengue. Agora, ita hahú tama udan monu-rai ne’e moras sa’e makaas mak dengue, entaun saida mak ita halo, komunidade no autoridade lokal, foinsa’e, agregada familia halo limpeza ba imi-nia hela fatin,” Diretora Nasionál Edukasaun no Promosaun Saúde iha Ministériu Saúde, Emilia de Jesus Mendonça, hateten ba jornalista sira nakait atividade sensibilizasaun ba loron mundiál sintina ho tema “Haris fatin, fatin ida ba pás,”, iha Kampus UNTL, Caicoli.
Nia apela, kada familia tenke hamoos uma laran loro-loron tara roupa sira di’ak iha uma laran hodi labele hamosu susuk barak.
Nune’e mos, uza repelente no moskeiteiru hodi bele proteje labarik sira iha uma maibé importante liu mak halo limpeza.
“Autoridade lokál sira tenke mobiliza limpeza jerál semana ida dala ida iha sira-nia suku. Inan-aman sira orienta família uma laran halo limpeza iha uma laran hodi redús pasiente ba ospitál no dengue, diareia, moras respiratória no kulit,” nia hateten.
Responsável ne’e mós sujere ba komunidade no autoridade lokál sira hodi soe lixu iha lixeiru hodi evita ezisténsia susuk dengue.
“Lixu sira imi ba soe iha fatin ne’ebé Governu prepara ona, halo separasaun ba lixu orgániku no naun orgániku hanesan plástiku hodi fasilita prosesu destruisaun ba lixu,” nia dehan.
Jornalista : Jesuína Xavier
Editór : Cancio Ximenes
