ERMERA, 21 novembru 2024 (TATOLI)- Emisaun Gás ho efeitu estufa, desflorestasaun atividade industriál sira no fatór umanu seluk kontribui ba mudansa klimátika globál no fó mós impaktu ba Timor-Leste (TL).
Komunidade iha Suku Lauana no Katrai Kraik husi postu administrativu Letefoho preokupa ho udan-been ne’ebé mak tinan ne’e la fó benifísiu ba sira-nia produtu agrikola no ortikultura sira ne’ebé kuda.
“Ami aldeia Leubasa udan agora tarde hanesan kuda batar mós tarde liu, entaun buat hotu la iha hanesan kontas, talas, ai-farina no koto. Entaun, tinan ida-ne’e udan tarde buat hotu-hotu la isin,” komunidade Marcos da Silva dehan ba jornalista sira iha Aldeia Leubasa Suku Launa, ohin.
Abitante Leubasa ne’e kompara katak klima tinan kotuk (2023) ho tinan ida-ne’e diferente los, tanba tinan kotuk udan tuir nia tempu hanesan babain no sira-nia produtu buras no folin di’ak tebes, maibé tinan ne’e komunidade sira la iha rendimentu ne’ebé diak tanba mudansa klimátika tinan ne’e afeta maka’as ba produtu sira.
“Buat hotu-hotu ami garantia ho udan-been de’it hanesan udan mai ami kuda udan la mai ami la kuda, maibé tinan ne’e ami la dun hetan osan, tanba udan-been ladi’ak hanesan batar mós ami balun la kuda, tanba udan mai tarde rai malirin tiha ona antaun ami kuda de’it mak talas sira, koto,” nia haktuir.
Iha fatin hanesan, Xefe suku Lau-Ana, Miguel Maia Gomes, hateten tinan ne’e komunidade Lau-Ana enfrenta problema boot mak hanesan bailoron naruk afeta ba komunidade nia plantasaun kafé no produtu sira seluk.
“Ita ko’alia kona-bá mudansa klimátika ne’e buat boot ida, ita haree ba situasaun reál liga ho mudansa klimatika ne’ebé akontese bailoron naruk ne’e afeta ba bee-matan maran no plantasaun moris ladi’ak liu-liu ita hare kafé no produtu lokál sira hanesan, batar, fehuk, talas, koto no seluk tan ne’ebé sira iha” nia afirma.
Iha sorin seluk, Xefe Suku Katrai Kraik Carlos da Costa Soares hateten, asuntu mudansa klimátika hanesan problema globál ne’ebé iha mundu no ema konsidera katak ida-ne’e problema sosiál ida-ne’ebé komunidade enfreta liu-liu iha suku Katrai Kraic rasik tinan ne’e la fó benefisiu ba produtu agrikola no ortikultura.
Autoridade lokál ne’e hatutan, asuntu mudansa klimátika buat ida-ne’ebé boot tebes, tanba impaktu mak tempu udan ho bailoron ne’e la hanesan.
“Bainhira iha udan, udan liu tiha. Bailoron naruk ne’e, bailoron naruk liu tiha. Tanba ne’e, nia impaktu ne’e boot hodi sai impede tiha liu-liu komunidade agrikultór sira labele kuda sira-nia produtu lokál sira ne’ebé mak iha fatin rurál sira ne’e sira-nia produtu labele la’o ho di’ak, tanba de’it impaktu udan ho anin estraga barak depois bailoron naruk liu tiha buat hotu-hotu la fó benifisiu,” nia konklui.
Entretantu, Suku Lauana iha aldeia rua mak hanesan: Alosai, Grotu, Hatugeo, Lemiluhi, Leubasa, Liabe, Quiri Lelo, Raebou/Ainapa, Raebou/Sloi, Roulo. Enkuantu, Suku Katrai Kraik iha aldeia rua mak hanesan: Baulisuria, Colo Coli, Hatudmei, Hatugeo, Hatulete, Leburema, Manturai, Manucoliria, Mausormata. Suku rua ne’e hola parte iha postu administrativu Letefoho, munisípiu Ermera.
Jornalista: Felicidade Ximenes
Editór: Rafael Ximenes de A. Belo
