DILI, 22 novembru 2024 (TATOLI)—Ministériu Solidariedade Sosiál no Inkluzaun (MSSI) oferese apoiu sosiál ba ema ne’ebé infetadu moras lepra iha munisípiu Manatuto.
“MSSI simu proposta husi Saúde Manatuto iha fulan-agostu, nune’e oferese foos saka 10 ba moras lepra iha postu Laclo, aldeia Fahi Lacor. Iha janeiru ita simu mós proposta husi Saúde Manatuto hodi apoiu foos saka 197, susu-been kaixa lima, koto saka tolu, no fore-mungu saka tolu,” Diretór Jerál MSSI, Florêncio Pina Dias Gonzaga, informa iha nia knaar fatin, Caicoli, sesta ne’e.
Notísia relevante : MLTL formaliza akordu ho RAEOA hodi kombate moras lepra
MSSI mós oferese apoiu direita hanesan foos 109, biti ho pakote komplementar 109 ba infetadu moras lepra, iha juñu 2024, ne’ebé identifika no propoin husi Asosiasaun Lepra Timor-Leste, husi postu Laclo, Laleia no Manatuto.
“Husi proposta hirak ne’e hotu MSSI apoiu ona totál foos hamutuk 316 ho pakote komplementar sira,” nia akresenta.
Nune’e, MSSI nafatin serbisu hamutuk ho Solidariedade Sosiál munisipál no Sentru Saúde hodi identifika no hein proposta husi munisipál no sosiedade sivil sira hodi nafatin toma atensaun no apoiu ai-han sira.
Jornalista : Osória Marques
Editora : Julia Chatarina