DILI, 27 novembru 2024 (TATOLI)–Prezidente Repúblika (PR), José Ramos Horta, akompaña husi Deputada Repúblika Indonézia (DPRI, sigla indonéziu), Julie Laiskodat, segunda ne’e,halo vizita ba Konventu Madre Asosiasi Lembaga Misionaris Awam (ALMA) iha Bebonuk, hodi haree direita labarik sira-nia kondisaun.
“Ha’u haree labarik ida ka rua iha ALMA, ha’u hakarak haree se bele lori bá li’ur halo operasaun, ida ha’u ko’alia tiha ona doutór matan lubuk ida iha Austrália, Suiça, no Inglatera, haruka tiha ona nia teste ba sira semana hirak liuba, doutór matan boot esperiénsia mundiál iha Inglatera, Suiça sira estuda hela, se bele halo operasaun nia bele haree uitoan ka la’e,” PR Horta hateten hafoin ramata halo vizita ba labarik sira iha Konventu Madre ALMA, Bebonuk.
Notísia relevante : Deputada Julie Laiskodat sente onradu simu kondekorasaun husi PR Horta
Aleinde ne’e, Prezidente Repúblika mós mós haree labarik ho kondisaun moras ida nia kondisaun, nune’e bele transporta bá li’ur hodi halo tratamentu.
“Ha’u hateten ba sira se imi bele opera ha’u rasik selu nia operasaun tanba se lae liuhusi Governu ne’e demora, liuhusi ne’ebé buka osan iha ne’e, Austrália, Inglatera, entaun ha’u hateten de’it se sentista sira hateten bele iha posibilidade nia rekupera matan la’ós 100%, mezmu 10% de’it ha’u hateten entaun ha’u rasik lori nia bá opera,” nia akresenta.
Iha biban hanesan Deputada Julie Laiskodat, informa, nia mai Timor-Leste tanba iha relasaun família, husi ohin to’o aban nia sei iha Timor-Leste, liu-liu iha Dili.
“Mai tanba hetan konvite husi Prezidente Repúblika tanba antes ne’e Prezidente Repúblika bá vizita sira no to’o iha sira-nia uma,hanesan iha NTT bainhira ema ruma bá ona ita-nia uma, ita mós tenke bá fali ninia uma,” nia tenik.
Julie Laiskodat dehan, ida-ne’e hanesan nia vizita dahuluk, nune’e vizita Konventu Madre Alma hodi labarik ema ho difisiensia.
“Ba ha’u la’ós buat foun tanba iha Flores no NTT mós iha, no antes ne’e ha’u mós vizita nu’udar espoza husi Governadór tanba antes ne’e laen hanesan Governadór NTT,” nia katak.
Deputada ne’e nota labarik sira iha Konventu ALMA ne’e maski fízikamente la kompletu maibe sira iha hanoin no kapasidade hanesan mós labarik ne’ebé la’ós ho kondisaun difisiénsia.
Jornalista : Osória Marques
Editora : Julia Chatarina
