DILI, 11 dezembru 2024 (TATOLI) –Asosiasaun Akadémika Estudantil iha Universidade Nasionál Timor Lorosa’e (AAE-UNTL) ezije Reitór UNTL, João Martins Soares, atu nafatin garante kualidade dezenvolvimentu UNTL nian.
“Hakarak hato’o ba magnifiku Reitór hanesan órgaun governasaun universidade nian, atu iha seriedade ba problema hirak ne’ebe akontese iha universidade tanba dezenvolvimentu universidade la’o hakdasak, “Portavós AAE-UNTL, Cesario João dehan liuhusi Konferénsia imprensa, iha UNTL, Caicoli, Dili, kuarta ne’e.
Cesario João akresenta, Asosiasaun Akadémika nota katak, atu balun organizadu no iha tendénsia maka’as lori UNTL ba rai naruk, karik estrutura la iha seriedade rezolve problema hirak ne’.
Tanba ne’e, tuir portavós ne’e, hakarak ejize ba estrutura universidade atu tau prioridade ba rezolve kestaun hirak ne’ebe komunidade akadémika enfrenta ba magnifiku Reitór ho nia etrutura katak, ezekusaun osan kaisa la serteza ba estudante sira tanba ne’e hakarak husu atu esklarese polítika Finansa osan kaixa UNTL nian ba reprezentante estudante tanba osan ida ne’e kontribui direita husi estudante.
Portavós husu magnifiku Reitór atu buka solusaun no rezolve urjenti kazu Departamentu Peska, Siénsia Mariña tanba agora daudaun estudante no profesór sira sai vítima.
Nune’e asaun pasifika no blokeia ne’ebé estudante sira halo ne’e organiza husi Asosiasaun Akademika Estudantil AAE-UNTL no la’ós tanba iha odiu-vigansa ruma ba estrutura universidade, no la’ós tanba hetan apoiu husi terseira pessoa.
Maibé, asaun ida-ne’e mosu tanba iha problema estruturál ne’ebé komunidade akadémika enfrenta.“Asaun pasífika ida-ne’e, la’ós ho intensaun atu kansela graduasaun iha fulan-dezembru, tanba osan kaixa UNTL, no problema universidade nian, laiha relasaun ho graduasaun tanba ne’e magnifiku Reitór labele uza graduasaun hodi hases aan husi problema universidade nian,” nia esklarese.
Portavós AAE-UNTL, Cesario João husu magnifiku Reitór ho nia estrutura atu rezolve problema infraesturtura universidade nian, liu-liu kestaun emerjésia sira hanesan casa de banho la sufisiente, ventuiña la funsiona, no falta projetór.
“Husu Pro-Reitór Auditória Garante Kualidade Interna UNTL, atu halo nia servisu loloos no profesionál hodi halo audit ba ezekusaun osan kaixa UNTL no polítika Finansa osan kaisa nian,” Cesario João dehan.
“No, husu ba sívitas akadémika UNTL atu nafatin hola nia pozisaun hamutuk ho Asosiasaun Akadémika Estudantil AAE-UNTL hodi izije ita-nia direitu ne’ebé ita rasik kontinua ona. Karik estrutura universidade ignora problema hirak ne’e mak asosiasaun akadémika no estudantil sira sei kontinua halo asaun,” nia apela.
Biban ne’e, Cesario João husu ba Komisaun Anti Korrupsaun (KAK) atu hakat kampus sentral tanba estudante deskonfia ezekusaun osan kaixa UNTL iha indísiu forte ba partisipasaun ekonómia. Nune’e rekomenda ba magnifiku Reitór atu tau konsiderasaun ba Estudantil sira-nia problema kona-ba ezijénsia ne’ebé estudante sira hato’o.
Universidade Nasional Timor Lorosa’e UNTL estabelese ho Dekretu Lei N.º 16/2010 hanesan Universidade Públika ida-ne’ebé vinkula ho prinsípiu legalidade hodi garante funsionamentu hotu- hotu tuir de’it regra/regulamentu, haree ba funsionamentu universidade nian Asosiasaun Akadémika Estudantil nota katak iha problema barak ne’ebé akontese iha universidade liu-liu iha infrasturtura, jestaun Finanseira, maski universidade ne’e finansia husi Orsamentu Jerál Estadu (OJE), no kontribuisaun estudante nian liuhusi Kaixa UNTL.
Problema sira ne’ebé akontese iha UNTL, AAE-UNTL tenta informa ba estrutura universidade maibé estrutura universidade ignora no laiha seriedade ba rezolve problema sira ne’ebé komunidade akadémika enfrenta, ho inkonsistensia estrutura universidade nia mak AAE- UNTL hamutuk ho estudante tomak, halo asaun pasífika iha loron 09/12/2024 maibé la iha resposta razoável husi estrutura universidade.
Nune’e, iha loron 10/12/2024 kontinua blokeia gabinete reitoria, no iha momentu mak hanesan reprezentante estudante aprezenta opsaun ba Magnifiku Reitór hanesan órgaun governasaun universidade nian, atu buka dalan hodi rezolve, maibé magnifiku reitór uza nia poder no ignoransia, hodi ameasa estudante sira katak se estudante sira blokeia gabinete mak nia sei kansela graduasaun iha fulan-dezembru, aktu ida ne’e puramente hatudu katak magnifiku reitór la iha kapasidade atu rezolve problema universidade nian ne’ebé afeta ba komunidade akadémika no atu ida-ne’e iha tendénsia lori UNTL ba rai-naruk.
Jornalista : Osória Marques
Editór: Rafael Ximenes de A. Belo
