DILI, 31 dezembru 2024 (TATOLI) – Arsebispu Arkedioseze Metropolitana Dili, Dom Virgílio Kardeál do Carmo da Silva, SDB, hateten, tinan-2024 sai no hela ba memória no istória.
“Oras balun Ita tama 2025 ba tinan foun, 2024 sei liu, husik hela memoria no sai istoria, momentu furak ita hateke ba kotuk no iha biban atu hadia, hateke ba oin oinsa ba oin. 2024 sai memória ne’ebé dala ruma bele husik memória moruk iha família no servisu fatin, maibé 2024 iha momentu ksolok lubun ida ba Itá ida-idak nia moris, balun Lori progresu no susesu,” Kardeál hateyen iha misa agradesementu tinan-2024 nian iha katedrál Díli.
Entaun, Arsebispu konvida sarani sira atu agradese ba tinan ne’ebé liu daudaun no halo reflesaun ba kotuk.
“Ohin kalan ida ne’e ita hato’o dehan obrigadu no agradesementu. Iha tinan-2024 nian ne’e ita atu husu ba Ita ida-idak nia aan katak 2024 esperiénsia di’ak ba ha’u? Valór sentidu saida ba ha’u? No iha progresu saida ba ha’u-nia moris,” nia dehan.
Iha tinan foun ida mai ne’e ha’u buka no esforsu atu sai inan-aman no oan ne’ebé di’ak no sai sidadaun ne’ebé di’ak, tanba tinan-2025 iha ona odamatan.
Dom Virgílio mós husu sarani atu hakat no simu tinan foun 2025 ho ksolok, “Mai Ita hakat ba 2025 ho ksolok no esperansa, tanba iha loron rua liubá ita loke ona tinan jubileu ho tema peregrinação da esperança,” relijiozu ne’e dehan.
Autoridade igreja Katólika neet reforsa katak Amu Papá konvida sarani hotu sai peregrinu esperansa nian. Prezente di’ak ne’ebé Na’in Maromak fó mai ema ida-idak no oportunidade dala ida tan Maromak fó mai atu krese la’ós de’it isin ka hanoin de’it, maibé espiritu.
“Atu hadi’a ita-nia aan no hatene nu’udar Maromak nia kriatura, oportunidade hatene hadomi no servi nia. Iha kontestu ema ida-idak nian família, servisu fatin. Iha tinan foun ita loke liman ba oportunidade no possibilidade ne’ebé sei mai, maske ita lahatene,” Kardeál reitera.
Ohin ita mai hamutuk ita agradese no simu tinan foun. Selebrasaun ohin kalan konvida ita hanesan leitura dahuluk ko’alia kona-ba bu’at hotu iha nia tempu, tempu atu moris, tempu atu ko’alia, tempu atu hadomi, tempu atu nonok no tempu atu harii dame.
Tinan bolu ema hotu atu moris iha tempu, tempu temporáriu no liu lalais laiha rohan-laek. Maibé Maromak de’it mak laiha Hun no Rohan laek, eternu
Iha segunda leitura são Paulo hakerek, “Ha’u hakerek ba imi, tanba la’ós imi lahatene lia-loos, maibé imi hatene katak lia bosok Laos husi lia los”.
Hanesan samea ba habosok Eva no Adão katak lalika fiar no tauk Maromak, ohin loron lia-bosok kontinua obstakulu no tendénsia ba ema katak na’in ba moris rasik, ba futuru no laiha ema seluk iha moris.
São João konvida ema hotu reflete Ministériu boot enkarnasaun natál ninian katak liafuan loloos, naroman ida mosu mai iha rai-klaran leno ema hotu ne’ebé mai moris ho ita.
“Maromak haruka São João atu fó sasin ba naroman ida-ne’e. Mai ita tama no simu 2025 ho naroman ksolok nian Natál nian. Naroman kosok-oan no mesias nian ne’ebé fó esperansa ba ita, naroman mundu nian no liurai mundu nian,” Kardeál konklui.
Jornalista: Jesuína Xavier
Editor: Rafael Ximenes de A. Belo
