DILI, 31 dezembru 2025 (TATOLI)–Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, husu ba sarani sira no ema hotu-hotu atu reza ba eroi nasionál sira-ne’ebé sakrifika sira aan ba rai ida-ne’e, tanba sira-nia sakrifisiu, dedikasaun, domin no sira-nia detreminasaun.
“Detreminasaun ida mak sira sakrifika sira-nia aan ba rai ida-ne’e. Husu saida ba ita, ita sira-ne’ebé sei moris no goza, ita labele haluha sira. Nu’udar fiar na’in ne’e, ita reza ba sira liuliu iha tempu Natál ne’e, ita reza ba sira. Sira luta fó aan ba mate tanba domin ba povu no raí ida-ne’e. Na’i Maromak haraik grasa no bensaun ne’ebé sira presiza iha Maromak nia kadunan,” Dom Virgílio Kardeál hateten ba jornalista sira nakait ho lroron nasionál eroi ne’ebé kada tinan selebra iha 31 Dezembru, hafoin selebrasaun misa abertura tinan jubileu 2025, iha Katedrál, domingu (29 dezembru 2024) ne’e.
Dom Virgílio hateten, iha tinan jubilee ho tema “Peregimo da Esperança” ne’e, hanoin hikas eroi sira-nia luta atu liberta povu no rai ne’e tanba sira-nia luta ho esperansa ida ba libertasaun nasionál.
Nu’udar sarani, nia dehan, esperansa boot liutan mak atu moris nafatin ho Maromak no komuñaun ho Maronak. Nu’udar sarani iha esperansa boot ida mak atu eroi sira goza rahun di’ak ida-ne’e iha Maromak nia sorin.
Arsebispu mós husu atu ema hotu la’o tuir ezemplu eroi sira-nian ba iha determinasaun rai ne’e nian hodi bele iha esperansa ba pás no rai ne’e nia di’ak.
“Ita sira-ne’ebé sei moris iha rai ida-ne’e haree ba sira sakrifisiu no dedikasaun no determinasaun inspira nafatin ema, hahú husi ita nia politiku no líder sira, inan aman sira no liu-liu foinsa’e sira hodi haree eroi sira-nia dedikasaun sai modelu ida. Sempre la’o tuir iha determinasaun katak rai ida-ne’e nia libertasaun, rai ida-ne’e nia moris di’ak, ksolok no pás ba ema hotu-hotu,” nia dehan.
Dom Virgílio hateten, eroi sira mak loke dalan atu iha kontinuidade hodi Timor bele iha dame, tanba loron 01 janeiru, amu Papa mós deklara loron Mundial ba Pás.
Jornalista : Jesuína Xavier
Editór : Cancio Ximenes
