SUÍÇA, 24 janeiru 2025 (TATOLI) – Prezidente repúblika, José Ramos Horta, haruka ona karta kongratulasaun ba prezidente eleitu Estadu Unidu Amérika (EUA), Donald Trump, ne´ebé simu ona pose iha 20 janeiru tinan-ne´e, iha Washintong DC, EUA.
“Sira kontente loos ho ha´u-nia mensajen,” Prezidente Horta haktuir ba TATOLI, maske la esplika konteúdu husi karta ne´e, hafoin partisipa Fórum Ekonómiku Mundiál, iha Davos, Suiça, kinta ne´e.
Xefe Estadu akresenta, “Iha esperansa husi Timor (Leste) ba mandatu foun Prezidente Trump nian maka aumenta liután serbisu hamutuk di´ak entre Timor no Amérika”.
Iha fatin hanesan, líder Estadu Timor-Leste ne´e destaka mós kona-ba relasaun entre EUA ho Repúblika Populár Xina.
“Iha mundu ne´e, nasaun poténsia boot liu maka Amérika no Xina. Se sira na´in rua kolabora, iha parseria di´ak, iha área ekonómiku, komersiál no diplomátika mundu sei sai di´ak liu,” Prezidente repúblika, José Ramos Horta rekoñese.
Entretantu, Donald Trump sai nu´udar Prezidente repúblika EUA ba da-47. Trump eleitu sai prezidente ba dala-rua, hodi substítiu prezidente sesante, Joe Biden. Serimónia toma pose Prezidente Donald Trump ne´e hetan partisipasaun hosi Xefe Estadu no Xefe Governu husi nasaun oioin, inklui autoridade amerikanu sira.
Jornalista: Jogerjo Guterres
Editór: Rafael Ximenes de A. Belo
