VIQUEQUE, 26 janeiru 2025 (TATOLI)—Kandidatu xefe suku úniku iha suku Macadique de Baixo, postu administrativu Uatulari, munisípiu Viqueque, Rogério da Silva, eleitu sai xefe suku ho votu maioria iha períodu 2025-2031.
Nia hateten, komunidade suku Macadique de Baixo depozita konfiansa tomak atu lidere suku ne’e, nune’e nia parte sei implementa planu no programa prioridade mak hanesan insfraestutura no bee-moos atu komunidade bele asesu.
“Konfiansa ne’ebé inan-amán inklui komunidade husi aldeia hitu (7) oferese ba ha’u hodi eleitu nu’udar xefe suku Macadique de Baixo. Ha’u prontu hodi servisu makaas, tanba ne’e suku foun ne’ebé foin eziste. Ha’u-nia planu dahuluk mak kria sede suku, prepara servisu administrasaun suku no sei haree funsionáriu na’in-rua (2) ne’ebé Governu rekruta hodi apoiu suku. Aleinde ne’e, ha’u mós sei haree dinamika moris suku Macadique de Baixo hodi haree dezenvolvimentu sira-ne’ebé durante hamutuk ho suku antiga Macadique ladún la’o karik, ha’u hamutuk ho ha’u-nia komunidade hadi’a iha ha’u-nia mandatu tinan hitu (7) nia laran (períodu 2025-2031),” Rogério da Silva hateten ba jornalista sira, iha suku Macadique de Baixo, ohin.
Notísia Relevante: CNE-STAE observa eleisaun suku foun iha Uatulari la’o hakmatek
Nune’e, nia sei tau atensaun ba programa sira-ne’ebé mai husi Governu hanesan Programa Nasionál Dezenvolvimentu Suku (PNDS), hodi hadi’a dezenvolvimentu suku Macadique de Baixo hanesan estrada, bee-moos no uma naroman ba povu (UNP).
“Tanba suku ida-ne’e presiza infraestutura liuliu estrada liga ba kada aldeia sira iha suku Macadique de Baixo ne’ebé ladún di’ak. Nune’e, iha ha’u-nia mandatu ida-ne’e, ami sei haree PNDS ba estrada sira-ne’ebé iha aldeia liga estrada boot, atu komunidade asesu nomós bee-moos ne’ebé durante komunidade enfrenta problema sira-ne’e bele rezolve. Antes ne’e, ami hamutuk ho suku Macadique ami labele rezolve problema komunidade nian tanba aldeia hamutuk 21. Maibé, agora daudaun ami bele rezolve tanba ami suku ketak ona iha aldeia hitu,” nia dehan.
Aleinde infraestutura, nia dehan, sei loke sentru formasaun naun formál nian ba juven sira iha suku Macadique de Baixo hodi joven sira bele aproveita kapasita sira-nia aan no hadi’a joven sira-nia mentalidade.
“Iha ha’u-nia mandatu ida-ne’e, ha’u mós sei kria sentru formasaun liuliu ba lingua no komputadór ba ita-nia ba joven sira hodi asesu no aprende,” nia dehan.
Iha biban ne’e, nia hato’o agradesimentu ba komunidade suku Macadique de Baixo ne’ebé iha eleisun suku foun ne’e fó komfinsa 100% ba nia hodi lidera suku foun ne’e.
Iha fatin hanesan, veteranu suku Macadique, Antonio Pinto “Mau-Lemos”, hateten veteranu suku ida-ne’e nian fó konfiansa ba jerasaun foun (Rogério) atu lidera suku Macadique de Baixo.
“Ami hatene katak nia (Rogerio) hanesan foin sa’e ida, ne’ebé nia sei hatene buat barak liuliu ba dezenvovimentu no serbí ami povu suku ida-ne’e ho domin no responsabilidade. Tanba ne’e, mak ami fó konfiansa ba nia hodi sai ami-nia lideransa ba suku ida-ne’e,” nia hateten.
Xefe aldeia Kokilaku, António da Silva, haktuir suku Macadique de Baixo eziste ona no iha ona xefe suku hodi lidera, fiar katak ba oin komunidade sei simu dezenvolvimentu barak kompara ho uluk hamutuk ho suku Macadique ne’ebé defisil tebes atu hetan dezenvovimentu.
“Maibé, ha’u sente ba oin, ami sei simu dezenvolvimentu liuliu hadi’a estrada, bee-moos no dezenvovimentu sira seluk. Ha’u nu’udár xefe aldeia, sei servisu hamutuk ho xefe suku hodi dezenvolve suku Macadique de Baixo ba oin,” nia dehan.
Tuir dadús, eleitór iha suku Macadique De Baixo nia aldeia hamutuk hitu (7) ne’ebé tuir votasaun ne’e kompostu husi aldeia Betulari iha eleitór mane 167 no feto 183 ho totál eleitór hamutuk 350 (35%); Gomioru iha eleitór mane 106 no feto 121 ho totál eleitór 227 (23%); Koquilako iha eleitór mane 57 no feto 64 ho totál eleitór hamutuk 141 (14%).
Aldeia Lacarate iha eleitór mane 100 no feto 112 ho totál eleitór 212 (21%); Lau-Uma iha eleitór mane 116 no feto 120 ho totál eleitór 236 (24%); Lutugia iha eleitór mane 118 no feto 111 ho totál eleitór hamutuk 229 (23%); Ossolari iha eleitór mane 107 no feto 123 ho totál eleitór hamutuk 230 (23%), ne’ebé totál eleitór iha suku rua ne’e hamutuk 1.625 (163%).
Jornalista : Vitorino Lopes da Costa
Editór : Cancio Ximenes
