DILI, 27 janeiru 2025 (TATOLI)—Fundadór no sosiu klube Karketu Dili FC, domingu (26/01) ne’e, realiza mini asembleia jerál hodi hili Luis Oliveira sai prezidente klube ba períodu tinan lima hahú 2025-2029 hodi substitui Adilson Ribeiro, tanba Adilson hetan konfiansa sai Sekretáriu Jerál Federasaun Futeból Timor-Leste (FFTL).
Notísia Relevante: Karketu DILI FC sólidu no preparadu kompete iha liga époka 2025
“Ha’u agradese tebes tanba hetan konfiansa husi fundadór no sosiu sira atu lidera Karketu du’urante tinan lima. Konfiansa hotu ha’u simu ho responsabilidade hodi halo servisu hotu atu haburas nafatin naran ida Karketu ne’e ba oin,” Luis Oliveira hateten ba Agência TATOLI iha Metiaut.
Nia dehan, durante nia lideransa ho tarjetu ida katak tenke sai kampiaun iha Liga Futeból Timor-Leste époka 2025 ne’ebé iha tempu besik FFTL sei reaiza.
“Karketu bainhira harii ho objetivu atu sai naran-boot iha nasaun ida-ne’e, iha ami-nia lideransa ne’e tarjetu mak ne’e, Karketu tenke sai kampiaun ba liga ida-ne’e,” nia dehan.
Nune’e, iha tempu besik estrutura foun ne’e sei realiza reuniaun hodi deside klube nia preparasaun hasoru liga époka ne’e.
“Atu prepara jogadór sira ba liga iha tempu besik ami sei hala’o reuniaun hodi hili jogadór sira no treinadór atu halo preparasaun másimu. Ita mós sei buka tan jogadór estranjeiru balun atu reforsa tan Karketu,” nia tenik.
Karketu Dili FC Mak klube sai kampiun iha Liga Amadora Epoka 2017 no Kampiaun liga Timor-Leste époka 2021 no 2022 sai hanesan klube Timor-Leste ne’ebé hetan títulu Kampiaun Dala-rua.
Maibé, iha tinan ne’e, Karketu FC sira hakarak halo istória defende titulu Kampiaun liga Timor-Leste no halo klube dahuluk iha Timor-Leste kampiun liga dala tolu tuir-tuir malu.
Jornalista : Hortencio Sanchez
Editór : Cancio Ximenes
