DILI, 28 janeiru 2025 (TATOLI)–Ministériu Juventude, Desportu, Arte, no Kultura (MJDAK), halo parseria ho Ajénsia Kooperasaun Internasionál Korea (KOICA) hodi kapasitasaun rekursu umanu liuhusi fó formasaun ba joven hamutuk na’in-30, prepara ba treinadór futeból ho sertifikadu nivel D ne’ebé realiza iha kampu multifunsaun Becora foin lalais ne’e.
Juventude 30 ne’ebé tuir treinamentu ne’e kompostu husi mane na’in-18 no feto na’in-12, ne’e durante treinamentu ne’e hetan formasaun kona-ba treinadór nian, atu nune’e iha futuru mai bele fó treinamentu ba jogadór juvenil sira.
Xefe Departamentu Federasaun Desportu MJDAK, José Monteiro, hateten formasaun ne’e la’ós de’it atu hetan sertifikadu maibé hakle’an liután kapasidade no abilidade treinadór sira-nian.
“Formasaun ida-ne’e la’ós de’it atu hetan sertifikadu, ida-ne’e kona-ba foti responsabilidade nu’udar líder sira iha futuru iha desportu. Treinadór sira hala’o kna’ar xave hodi hakbi’it joven sira, no hodi kontinua hasa’e ita-boot sira-nia abilidade, ita-boot sira sei kontribui ba kreximentu futeból nian iha Timor-Leste no ajuda ami kompete iha palku internasionál,” José hateten liuhusi komunikadu imprensa ne’ebé Agência TATOLI asesu, ohin.
Formasaun ne’e fó direta husi formadór husi KOICA no koolabora hamutuk mós ho Federasaun Futeból Timor-Leste (FFTL).
Programa ne’e iha sesaun loro-loron hamutuk rua (2), treinamentu prátiku iha dadeer no klase teóriku iha lorokraik. Ida-ne’e dezeña atu prepara treinadór sira ba futuru foka ba abilidade téknika sira, kompreensaun tátika no estratéjia sira envolvimentu juventude nian.
Adjuntu Sekretáriu Jerál FFTL, Fernando Xavier, afirma formasaun ne’e signifikatifu no importante atu iha treinadór sira-ne’ebé ho kualidade di’ak.
“Atu bele hetan jogadór sira-ne’ebé di’ak, ita presiza treinadór sira-ne’ebé di’ak. Kolaborasaun entre MJDAK no KOICA ida ne’e hanesan investimentu folin ba ita nia futuru. Nu’udar partisipante sira, agora ita-boot sira iha responsabilidade atu aplika saida mak ita-boot sira aprende ona, treinu jogadór foun sira, no ajuda dezenvolve sira-nia abilidade no karáter tantu iha kampu laran no iha kampu li’ur,” nia hateten.
Benefisiáriu ba treinamentu ne’e, Juvencia Xavier, hato’o agradesimentu ba oportunidade ne’ebé iha no sei implementa ba sosiedade buat ne’ebé sira heta du’urante formasaun.
“Ami agradese ba KOICA, FFTL, no MJDAK ne’ebé fó ona formasaun folin-boot ida-ne’e mai ami. Simu sertifikadu rua–ida husi KOICA no sertifikadu treinadór Grau D–mak priviléjiu ida ne’ebé sei loke odamatan ba ami. Ami hetan ona koñesimentu kona-ba tékniku sira treinadór nian, regra sira seguransa nian, igualdade jéneru nian, nutrisaun no tátika sira hodi dezenvolve jogadór sira no hametin futeból iha Timor-Leste,” nia dehan.
Nia dehan, nia hein atu FFTL no MJDAK sei oferese tan programa formasaun sira, hanesan oportunidade atu avansa husi sertifikasaun Grau D ba Grau C, tanba ida-ne’e sei permite nia atu halo impaktu boot liu iha dezenvolvimentu futeból iha Timor-Leste.
Inisiativa ida-ne’e reflete kompromisu kontínua MJDAK no KOICA nian hodi harii ekosistema desportu ne’ebé sustentável liuhosi hakbiit treinadór lokál sira no prepara jerasaun talentu futeból tuirmai iha Timor-Leste.
Atividade ne’e la’o tanba iha kolaborasaun entre MJDAC, Koica no FFTL.
Jornalista : Hortencio Sanchez
Editór : Cancio Ximenes
