DILI, 31 Janeiru 2025 (TATOLI) – Ministériu Edukasaun (ME), liuhusi Institutu Nasionál Formasaun Dosente no Profisionál Edukasaun (INFORDEPE), kontinua kapasita literasia bázika no fonétika ba profesór hamutuk 100 husi ensinu pre-eskolár no ensinu báziku primeiru síklu iha territóriu.
“Formasaun ida-ne’e bazeia ba ita-nia enkontru liga ho planu asaun iha 2025, ita hotu nafatin esforsu ba hadi’a abilidade literasia iha nível pré-eskolár no ensinu báziku, tan ne’e, Ministériu Edukasaun liu hosi INFORDEPE hakarak ita hotu atu armoniza konteúdu iha nível sira ne’e, hodi foka ba abilidade sira ne’ebé labarik sira presiza dezenvolve hodi aprende le’e, inklui fonétika”, Prezidente INFORDEPE, Domingos Martins, dehan iha nia knaar fatin Balide, sesta ne’e.
Martins dehan, iha péritu sira deskobre katak, fonétika ne’e ajuda tebes labarik sira hodi komprende relasaun entre letra no lian.
“Péritu sira iha área fonétika nian deskobre katak fonétika ajuda labarik sira atu komprende relasaun entre letra no son sira, hodi permite sira atu koñese liafuan foun sira ho efisiente”, nia esplika.
Prezidente husu atu manorin sira nafatin atu aprende ho di’ak liután iha literasia nian, nune’e iha futuru bele hetan rezultadu ne’ebé di’ak.
“Ita tenke aprende hamutuk hodi fahe ita-nia koñesimentu foun sira ba-malu, liuliu estratejia efetivu sira liga ho hasa’e abilidade manorin sira nian, liuhusi envolve aan iha atividade literasia nian, atu nune’e iha futuru ita bele observa rezultadu pozitivu hosi profesór sira-ne’ebé partisipa formasaun ida-ne’e”, nia tenik.
Formadora Aurora Assunção Sarmento hatete, dezafiu ne’ebé Ministériu Edukasaun hasoru maka labarik sira barak mak seidauk hatene lee, entaun molok atu hatene lee presiza hatene uluk letra ne’e ninia son, liga ho liafuan no fraze sira.
“Formasaun ne’e ho nia objetivu atu haklean koñesimentu ba fasilitador/a, mentór lokál no nasionál sira hotu kona-ba literásia tetun liuliu iha área fonétika, tanba daudaun dezafiu ne’ebé Ministériu Edukasaun hasoru maka labarik sira barak mak seidauk hatene lee, entaun molok atu hatene lee presiza hatene uluk letra ne’e ninia son, liga ho liafuan no fraze sira”, nia esplika.
Nia afirma, formasaun ne’e hanesan esforsu hosi Ministériu Edukasaun liu hosi INFORDEPE atu reforsa manorin sira iha baze hodi hasa’e sira nia abilidade led no hakerek iha nível pré-eskolár to’o ensinu báziku síklu 1 no 2.
Purtantu, formasaun ne’e la’o durante semana ida, hahú ona iha loron 27 to’o 31 janeiru 2025.
Jornalista: OsóriaMarques
Editór : Zezito Silva
