DILI, 03 fevereiru 2025 (TATOLI)–Governu liuhusi Ministériu Juventude, Desportu, Arte no Kultura (MJDAC) hamutuk ho Federasaun Boxe Amadora Timor-Leste (FBATL), segunda ne’e, hala’o enkontru hodi diskute kona-ba planu no atividade ba kompetisaun SEA Games 2025.
Enkontru ne’e partisipa husi Ministru Juventude, Desportu, Arte no Kultura (MJDAC), Nelyo Isaac Sarmento hamutuk ho Diretór Jerál Desportu João M. Rodrigues no Prezidente Federasaun Boxe Amadora Timor-Leste (FBATL) João J. Fernandes no ekipa téknika sira.
Iha reuniaun ne’e, Prezidente Federasaun Boxe Amadora, João J. Fernandes, aprezente planu atividade kompetisaun ne’ebé kompostu husi eventu prinsipál haat (4) mak hanesan:
1.Kampionatu ba loron PNTL–Kompetisaun ida-ne’ebé sei hala’o ba omenajen ba Polísia Nasionál Timor-Leste (PNTL).
- Kompetisaun ABC Sea Games Juniór–Eventu ida atu fó oportunidade ba atleta foun atu prepara-an ba SEA Games.
- Kompetisaun ba loron Restaurasaun Independénsia–Sei hala’o iha loron 15 Maiu 2025, hodi marka momentu importante iha istória nasional.
- Partisipasaun iha Kompetisaun SBC iha Qatar – Atleta sira sei partisipa iha kompetisaun internasionál iha Fulan Juñu 2025, no fó oportunidade ba árbitru sira atu hetan esperiénsia.
“Ami hakarak relata ba Ministru kona-ba preparasaun sira ba jogu SEA Games, inklui oportunidade ba árbitru sira atu hetan esperiénsia iha eventu internasionál,” Prezidenti Boxe ne’e hateten iha nota ne’ebé Agência TATOLI asesu husi media MJDAC, ohin.
Ministru Juventude, Desportu, Arte no Kultura (MJDAC), Nelyo Isaac Sarmento, hateten maske iha dezafiu ne’ebé federasaun sira hasoru maibé prioridade tenke fó preparasaun ba atleta sira ba SEA Games 2025.
“Tinan ida ne’e mak tinan importante ba presatasaun atleta sira. Ami ezije katak federasaun sira hahú identifika no halo selesaun ba atleta sira-ne’ebé sei partisipa iha Sea Games. Selesaun finál tenke kompleta antes fulan-novembru 2025,” nia dehan.
Ministru mós subliña katak, Governu sei kontinua fó prioridade ba desportu, inklui Boxe Amadora, atu asegura katak Timor-Leste bele reprezenta-aan ho di’ak iha eventu internasionál.
Jornalista : Hortencio Sanchez
Editór : Cancio Ximenes