DILI, 03 fevereiru 2025 (TATOLI)–Ministru Juventude, Desportu, Arte no Kultura (MJDAC-sigla portugés), Nelyo Isaac Sarmento, segunda ne’e, hala’o reuniaun ho Federasaun Karate-do Timor-Leste (FKTL) atu finaliza planu implementasaun programa karate ba tinan 2025, iha edifisiu MJDAC Lecidere, Dili.
Iha enkontru Ministru Nelio Isaac hamutuk ho ekipa MJDAC inkluí Diretór Jerál Desportu João M. Rodrigues no Diretór Nasionál Oscar Dias Quintas ne’e, sira diskute ho lideransa FKTL kona-ba kampionatu nasional ne’ebé sei hahú iha fulan-abríl tinan 2025.
“Kampionatu nasionál ne’ebé ita atu hala’o ne’e, labele fó ba seniór sira de’it. Maibé ita presiza inklui juniór sira hodi prepara sira ba Jogu CPLP 2025 no SEA Games ne’ebé sei tuir mai,” Ministru Nelyo Isaac hateten liuhusi nota imprensa ne’ebé Agência TATOLI asesu, tersa ne’e,
Nia subliña tan katak, eventu sira-ne’e labele hala’o de’it iha kapitál Dili maibé tenke realiza mós iha munisípiu sira hanesan Maliana no Lospalos ne’ebé reprezenta zona nia naran iha Timor-Leste.
Tuir planu husi FKTL, atleta sira sei partisipa iha eventu internasionál karate-do rua iha Vietnam no Filipina iha fulan juñu no jullu 2025. Kompetisaun sira-ne’e sei inklui kategoria juniór no seniór, ho objetivu atu aumenta preparasaun atleta sira ba nivel internasionál.
“Ho planu ne’e, ami espera katak karate iha Timor-Leste sei sai forte liután no bele reprezenta nasaun ho orgullu iha eventu internasionál,” nia dehan.
Preparasaun Karate-do ba jogu CPLP
Antes ne’e, Sekretariu Jerál FATL António Carlos de Araujo hateten federasaun prepara ona atleta hamutuk na’in-haat hodi kompete iha jogu CPLP ne’ebé sei realiza iha fulan jullu mai ne’e, iha ne’ebé Timor-Leste mak sai hanesan uma-na’in.
Atleta ne’ebé FATL prepara ona ne’e kompostu husi mane rua (2) no feto rua (2) no feto rua (2) sei joga iha klase kilograma 48-53, enkuantu mane na’in-rua (2) sei joga iha kilograma 55-60.
Jogu CPLP tinan ida-ne’e sei hetan partisipasaun másimu hosi Estadu-membru sira ho delegasaun Angola mai ho partisipante 101, Brazil 101, Cabo Verde 101, Guiné Bissau 61, Guiné Ekuatoriál 35, Mosambique 70, Portugál 101, São Tomé e Prínsipe 35 no Timor-Leste 101.
Eventu importante ida-ne’e hatudu Timor-Leste nia kompromisu atu haburas interkámbiu kulturál no atlétiku iha komunidade CPLP nia laran.
Jornalista : Hortencio Sanchez
Editór : Cancio Ximenes
