DILI, 10 fevereiru 2025 (TATOLI)–Governu liuhusi Ministériu Juventude, Desportu, Arte no Kultura (MJDAK), segunda ne’e, halo abertura ba Gashaku Nasionál Shorinji Kempo 2025 iha Salaun INFORDEPRE, Balide, Dili, ne’ebé halibur entidade Governu no reprezentante setór desportu oioin.
Ministru Juventude, Desportu, Arte no Kultura (MJDAK), Nelyo Isaac Sarmento, hateten modalidade Shorinji Kempo nu’udar federasaun ida-ne’ebé kompromete ba profisionalizasaun husi nia rekursu sira no dezenvolvimentu husi dixiplina desportiva.
“Federasaun desportu sira tenke mantein organizasaun ida-ne’ebé sólidu hodi garante dezempeñu exelente. Dedikasaun no dixiplina mak esensiál atu hetan rezultadu di’ak sira no Shorinji Kempo hatudu ona abilidade ida-ne’e. Governu sei kontinua fó apoiu ba inisiativa sira-ne’ebé promove formasaun no exelente iha desportu,” Ministru Juventude, Desportu, Arte no Kultura (MJDAK) ne’e hateten liuihusi diskursu, ohin.
Governu nia kompromisu mak fó apoiu ba Federasaun Shorinji Kempo iha dezenvolvimentu desportu ne’e iha Timor-Leste.
Nia dehan, Governu prepara hela apoiu ba realizasaun Kampeonatu Aziátiku Kempo iha rai-laran, ne’ebé marka ona ba fulan-novembru tinan ne’e.
Embaixadór Japaun iha Timor-Leste, Tetsuya Kimura, eventu ne’e nu’udar oportunidade ba atleta sira atu hasa’e sira-nia abilidade téknika.
“Shorinji Kempo iha Timor-Leste evolui pozitivu. Ida-ne’e mak oportunidade di’ak ida ba atleta sira atu hetan koñesimentu foun no prepara ba kompetisaun internasionál sira. Ha’u enkoraja ema hotu atu aproveita momentu ida-ne’e hodi hametin desportu iha rai-laran,” Embaxadór ne’e hateten.
Serimónia abertura ne’e, partisipa mós husi Ministra Edukasaun, Dulce Soares, Embaixadór Japaun, Tetsuya Kimura, Prezidente KRAM, Octávio da Conceição, no entidade relevante sira seluk husi setór desportu no Governu nian.
Jornalista : Hortencio Sanchez
Editór : Cancio Ximenes
