DILI, 24 Fevereiru 2025 (TATOLI)—Komisáriu Komisaun Antí Korrupasaun, Rui Pereira dos Santos, hateten Komisaun Antí Korrupasaun (CAC-sigla portugés) konklui ona investigasaun ba kazu Diretór Jerál Servisu Korporativu Ministériu Agrikultura Peska Pekuária no Floresta (MAPPF) ho inisiaál RRG ne’ebé suspeitadu fó projetu ba malu iha MAPPF.
“Prosesu la’o hela. Ninia konkluzaun ne’e iha loron hirak liubá komisáriu asina tiha ona hodi haruka ona bá Ministériu Públiku (MP),” Rui Pereira ba TATOLI iha edifísiu CAC, Faról, Dili, sesta (21/2).
Rekorda fali katak iha loron 9 fulan-Outubru 2024, Tribunál Judisiál Primeira Instánsia Dili (TJPID) hasai mandadu judisiál ho númeru: 0004/24 CAC TL hodi autoriza CAC hala’o buska domisiliária ba rezidénsia RGG ne’ebé suspeitadu fó projetu ba malu iha MAPPF.
Mandadu judisiáriu ne’ebé asina husi juiza Ana Paula Fonseca, fó orden ba CAC atu halo buska domisiliária ho posibilidade bá apreende sasán ne’ebé mak bele iha ligasaun ho faktu hirak ne’ebé investiga ona iha suspeitu nia fatin tuir dispozisaun iha artigu 168 númeru 1 inklui artigu 170 husi Kódigu Penál Timor-Leste.
Antes ne’e, CAC asegura diretór na’in rua tanba suspeitadu fó projetu ba nia kolega. Ekipa CAC asegura kargu xefia na’in rua ne’e iha sira na’in rua nia kna’ar fatin, MAPPF, iha Comoro, tersa (17/9), tuku 08:30 dadeer.
Hafoin asegura tiha kargu xefia na’in rua ne’e, lori kedas bá iha edifísiu Komisaun Antí Korrupsaun hodi submete ba prosesu identifikasaun durante oras 12 tuir artigu 52 Kódigu Prosesu Penál.
Ekipa Komisaun Antí Korrupsaun halo mós apreensaun bá dokumentu balun ne’ebé liga ba projetu iha Ministériu Agrikultura Peska, Pekuária no Floresta.
Notísia relevante: CAC buska ba rezidénsia RG suspeita fó projetu ba malu iha MAPPF
Iha prosesu identifikasaun ne’e, kargu Xefia MAPPF na’in rua ne’e koopera di’ak tebes ho ekipa Investigasaun Kriminál CAC nian hodi prosede ba identifikasaun tuir lei haruka.
“CAC iha kompeténsia ba asaun prevensaun no investigasaun kriminál nian, tanba ne’e ekipa CAC halo kedas asaun proativa ida hodi bele hatene loloos motivu hosi informasaun ne’ebé espalla iha mídia sosiál ne’e loos ka lae,” Diretór Investigasaun CAC, José Verdial, hateten.
Nia dehan, kualkér informasaun ne’ebé espallada, liga ho informasaun ba indísiu nian, entaun CAC hanesan órgaun ida-ne’ebé iha kompeténsia hodi haree kona-ba iha tipu krime hanesan ne’e, nune’e CAC tenke asegura hodi halo prevensaun.
Identifika funsionáriu 60
Iha fatin hanesan, Komisáriu Rui Pereira haktuir katak CAC notifika funsionáriu 60 resin husi Ministériu Interiór (MI) ba kazu má-administrasaun.
“Ami horibainhira ne’e notifika ema na’in 60 resin husi Ministériu Interiór atu foti sira-nia deklarasaun, nune’e investigadór prosesa sira iha-ne’e semana ida,” nia informa.
Komisáriu esplika CAC notifika funsionáriu 60 resin ne’e tanba kestaun balun ne’ebé la’o ladún loos iha Ministériu Interiór hanesan má-administrasaun liuliu la halo pagamentu osan viajen bá munisípiu ka MOP ba funsionáriu MI ne’ebé halo serbisu bá munisípiu.
Jornalista: Natalino Costa
Editór: Xisto Freitas da Piedade
