DILI, 09 outubru 2024 (TATOLI) – Tribunál Judisiál Primeira Instánsia Dili (TJPID), iha kuarta (9/10) ohin, hasai mandadu judisiál ho númeru 0004/24.CAC TL hodi autoriza Komisaun Anti- Korrupsaun (CAC, sigla portugés) hodi halo buska domisiliáriu ba rezidénsia RG ne’ebé suspeita ba kazu fó projetu ba amigu iha Ministériu Agrikultura Peska, Pekuaria no Florsta (MAPPF).
Mandadu judisiáriu ne’ebé asina hosi Juiza Ana Paula Fonseca, hateten fó orden ba CAC atu halo buska domisiliáriu ho posibilidade ba preende sasan ne’ebé mak bele iha ligasaun ho fatu hirak ne’ebé investiga ona iha suspeitu nia hela fatin tuir disposizaun iha artigu 37, númeru 2 husi Konstituisaun RDTL no artigu 226 númeru 1 alinea C no artigu 168 númeru 1 inklui artigu 170 husi Kódigu Penál Timor-Leste .
“Ha’u haruka fó orden atu halo domisiliáriu ho posibilidade ba preende sasan ne’ebé mak bele iha ligasaun ho fatu hirak ne’ebé investiga ona iha suspeitu nia hela fatin”, hateten husi komunikadu ne’ebé TATOLI asesu kuarta, ohin.
CAC iha kuarta (9/10) ohin tuku 9:00 dader ezekuta mandadu husi Tribunál, hodi ba halo buska domisiliáriu ba suspeitu RG nia rezidénsia ne’ebé lokaliza iha Wedaek Suku Bairru Pite, Postu Administrativu Dom Aleixo Munisípiu Dili iha buska domisiairiu ne’e, CAC konsege halo apreensaun ba dokumentu balun ne’ebé suspeita ba projetu balun ne’ebé iha Ministériu Agrikultura Peska Pekuaria no Floresta
CAC nia buska domisiliáriu iha RG nia rezidénsia, CAC mós ba haree hodi investiga karreta privadu RG nian ne’ebé RG uza hela no husi buska ne’e CAC konsege halo apreensaun ba dokumentu balun ne’ebé suspeita ba projetu iha Ministériu Agrikultura Peska, Pekuaria no Floresta.
Hafoin CAC halo tiha buska no apreesaun iha RG nia rezidénsia, CAC kontinua ba RG nia servisu fatin iha Ministériu Agrikultura no Peska Pekuaria no Floresta iha Comoro hodi kontinua halo buska no apreensaun.
Iha prosesu buska no apreensaun~, CAC mós foti evidénsia hanesan dokumentu balun tán inklui foti RG nia telemovél.
Bainhira CAC konklui tiha buska domisiairiu no apreensaun ba RG nia rezidénsia no nia servisu fatin, ekipa CAC lori kedan sasan apreendidu sira ne’e mai edifisiu CAC hodi halo análize.
Jornalista: Natalino Costa
Editór : Zezito Silva
