DILI, 25 Fevereiru 2025 (TATOLI) – Institutu Apoiu Dezenvolvimentu Emprezariál (IADE) lansa Kompetisaun Planu Negósiu Inovadór (KPNI) 2025 ba da-11 ho tema “Inovasaun mak dalan ba susesu”.
Diretór-Ezekutivu Institutu Apoiu Dezenvolvimentu Emprezariál, Filomeno Marcelino Belo, hateten KPNI ba tinan ne’e hanaran multisetorál, signifika ideia negósiu hothotu bele partisipa kompetisaun no importante maka mai ho inovasaun.
“Kompetisaun tinan ne’e foku liu ba joven inovadór sira maihusi munisípiu hotu-hotu hodi hola parte kompetisaun ida-ne’e ho objetivu fó oportunidade ba joven sira hola parte iha setór emprezariál no fasilita apoiu sira bele sai emprezáriu ne’ebé susesu iha futuru mai”, Filomeno Marcelino Belo dehan iha Sentru Konvensaun Dili, ohin.
Nia esplika katak KPNI 2025 ne’ebé ohin lansa ona hahú ohin sei halo rejistu ho alvu ba partsipante na’in-400, husi númeru ne’e sei halo avalisaun didi’ak ho ta’is no ikus tenke iha iha ema na’in-sanulu mak manán.
“Atu hetan manán na’in-sanulu ne’e prosesu durante fulan neen ka hitu. Bainhira iha ona vensedór mak Institutu Apoiu Dezenvolvimentu Emprezariál sei apoia finansiamentu no asisténsia téknika ba sira durante tinan rua”, dehan.
Orsamentu ne’ebé prevee, iha tinan ne’e, ba KPNI hamutuk rihun $25, husi montante ne’e mak sei fahe ba manán-na’in hahú husi rihun $3 to’o $7.
Iha fatin hanesan Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, hateten KPNI ne’ebé IADE lansa ne’e importante, tanba Governu nia kompromisu atu promove inovasaun ho emprezáriu nu’udar xave ida ba diversifikasaun ekonómika no kreximentu sustentavel iha Timor-Leste.
Tuir nia, KPNI ba tinan ne’e hanesan plataforma ida atu prepara joven mane no feto sira ne’ebé ho abilidade koñesimentu rekursu atu dezenvolve planu negósiu ba iha kompetisaun.
Governante ne’e hateten divizasaun Governu nian aliña ba kompetisaun programa ekonómiku nian, liuliu ba setór prioridade sira hanesan agrikultura, turizmu no indústria.
Vise-primeiru-ministru ne’e mós promete ba oin MKAE sei haree apoiu kréditu ba partsipante 400 ne’ebé tuir kompetisaun ne’e hodi ajuda sira-nia planu negósiu ruma.
Kompetisaun Planu Negósiu 2025 ne’e MKAE sei apoiu mós orsamentu rihun $15, nune’e husu ba IADE ho ekipa halo selesaun didi’ak ba partisipante sira.
“Haree didi’ak ida ne’ebé presiza ajuda. Ita tenke ajuda tanba ita apoiu liuhusi mikro ekonómiku, tanba bainhira emprezáriu ki’ik sira la’o ona, maibé la depedente ba ema seluk, sira mós harii rasik sira-nia negósiu ho di’ak husi ki’ik no futuru bele sai negosiante boot. Tanba inovasaun nu’udár katalista ba kreximentu no inovasaun nu’udar dalan ida ba susesu”, nia subliña.
Relembra katak, iha 2024, IADE loke ona KPNI ba ema na’in-400 no ikus mai na’in-13 mak sai manán-na’in. Atividade ne’e preve totál orsamentu rihun $35.
Notísia relevante: IADE nia programa FIN-KPNI, ajuda dezenvolve ona MPME hamutuk 34
Jornalista: Arminda Fonseca
Editora: Maria Auxiliadora
