DILI, 26 Fevereiru 2025 (TATOLI) – Konsellu Ministru nomeia Elizeu Isaac Fernandes hodi asume kargu nu’udar Prezidente foun Konsellu Administrasaun Rádiu no Televizaun Timor-Leste, E.P (RTTL, E.P) ba mandatu tinan haat no ezonera José Belo husi kargu Prezidente RTTL.
Projetu rezolusaun Governu ne’e aprezenta husi Sekretáriu Estadu Komunikasaun Sosiál, Expedito Dias Ximenes.
“Nomeasaun ne’e bazeia ba kapasidade téknika no jestaun ne’ebé rekoñesidu husi prezidente foun, nomós ninia esperiénsia profisionál, senioridade, idoneidade no imparsialidade”, hateten komunikadu husi Governu.
Elizeu Isaac Fernandes, moris iha Same, iha loron 13 Marsu 1986, hanesan atuál Xefe Gabinete Sekretáriu Estadu Komunikasaun Sosiál, ne’ebé iha esperiénsia profisionál hanesan asesór mídia no komunikasaun iha Gabinete Ministru Administrasaun Estatál entre 2018 no 2020.
Sai mós hanesan ofisiál mídia iha Gabinete Sekretaria Estadu ba Apoia Sósiu-Ekonómiku iha tinan 2017 to’o 2018.
Aleinde ne’e hanorin mós iha Universidade Nasionál Timor Lorosa’e, iha Fakuldade Siénsia Sosiál, iha Departamentu Komunikasaun Sosiál entre 2013 no 2018.
Iha 2013 to’o 2017, hala’o knaar nu’udar ofisiál mídia iha Diresaun Nasionál Promosaun Sósiu-Ekonómiku Muller iha Sekretaria Estadu Promosaun Igualdade.
Prezidente foun RTTL ne’e hasai nia kursu mestradu iha Universitas Dr. Soetomo, Surabaia-Indonézia, iha Fakuldade Komunikasaun Sosiál no kursu lisensiatura iha Sekolah Tinggi Ilmu Komunikasi, Semarang-Indonézia.
Jornalista: Arminda Fonseca
Editora: Maria Auxiliadora
