VIKEKE, 27 Fevereiru 2025 (TATOLI)—Prezidente Asosiasaun Feto potensiál munisípiu Vikeke, Luciana Guterres, hateten Asosiasaun Feto potensiál munisípiu Vikeke sei identifika feto potensiál prepara aan no prontu apoia polítika Governu ba implementasaun podér lokál no dezentralizasaun administrativa.
Notísia Relevante: Feto potensiál Vikeke kria kampu servisu ba joven sira
“Preparasaun simu poder lokál no dezentralizasaun, ami sei identifika feto potensiál sira hodi kapasita sira hodi prepara ba implementasaun podér lokál no dezentralizasaun. Karik polítika ne’e implementa iha Vikeke, feto mós bele envolve iha munisípiu, postu no kargu xefia sira”, Presizedente Asosiasaun Feto potensiál munisípiu Vikeke ne’e hateten ba Agência Tatoli, iha postu Vikeke Vila, ohin.
Nia hatutan, programa implementasaun poder lokál ne’e sai importante entaun feto sira prontu atu koopera no serbí, hodi komunga prinsipiu “mate ka moris ukun rasik aan” tanba la’ós mane de’it mak luta ba rai ida-ne’e maibé feto mós fó aan no defende rai Timor-Leste.
Tanba ne’e, nia dehan, implementasaun poder lokál no dezentralizasaun administrativa ne’e hanesan oportunidade ba feto sira, la’ós ba mane de’it mak okupa kargu xefia sira.
“Tantu feto no mane iha diretu hanesan hodi kompete ba kargu importante sira iha munisipál. Nune’e, karik polítika ida-ne’e implementa, ami-nia feto maluk sira sei kompete iha eleisaun kámara munisipál tanba ami mós hakarak luta la’i hamutuk ho mane sira hodi lori munisípiu Vikeke ba oin, ami prontu simu podér lokál,” nia dehan.
Nia relata, eleisaun komunitária ne’ebé realiza iha tinan 2023 ne’e feto potensiál munisípiu Vikeke totál hamutuk na’in-60, no husi númeru ne’e feto na’in-21 maibé la liu iha eleisaun no kompete ba xefe suku no na’in-39 kompete ba xefe aldeia.
Notísia Relevante: SEI enkoraja feto potensiál Vikeke kompete iha eleisaun lideransa komunitária
Jornalista : Vitorino Lopes da Costa
Editór : Cancio Ximenes
