DILI, 27 Fevereiru 2025 (TATOLI)-Miguel Freitas Faluchay, deside retira husi kandidatura ba Konsellu Imprensa (CI, sigla portugés) husi Parlamentu Nasionál (PN).
Tuir lei komunikasaun sosiál númeru 5/2014, 19 Novembru, artigu 45, alínea c haktuir, Parlamentu Nasionál sei hili ema-nain rua, ida ho kapasidade profisionál komunikasaun sosiál no ida seluk mak jurista.
“Ha’u mai ko’alia ho komisaun G, aprezenta-an no foti pozisaun ida katak, ha’u rejeita no laiha disponibilidade atu ba KI”, antigu jornalista RTTL, E.P ba jornalista sira iha uma fukun.
Nia konsidera KI hanesan orgaun independente, nune’e rejeita konvite ne’e, tanba tama ona vida polítika.
“Ha’u ema polítiku, nune’e labele ba KI atu hala’o serbisu hanesan profisionál iha ne’eba”, argumenta tan. “Ein-prinsípiu, sira foti ha’u nia naran, ha’u hakarak, maibé hanesan ema, tenke tetu buat barak, entaun deside dada fila”.
Sorin seluk, Prezidente Komisaun G ne’ebé trata asuntu Edukasaun, Juventude Desportu no Sidadania, Armando Lopes, informa audénsia ne’ebé sira-nia parte halo atu rona filafali kandidatu sira-nia hanoin.
Nia dehan tan, pesoál ne’ebé hasoru ida hato’o ona disponibilidade, enkuantu ida seluk la marka prezensa la-ho justifikasaun.
Deputadu husi Bankada Partidu Demokrátiku (PD) ne’e hateten, komisaun aprova ona relatóriu no sei submete ba Prezidente PN hodi deside. Atu loke fali aprezentasaun kandidatu seluk ne’e desizaun líder bankada nian, katak nia.
Antes ne’e, bankada Governu husi PD iha PN, propoin kandidatu, Benevides Correia Barros, ba KI.
“Bankada PD iha proponente ba área jurídiku, ami propoin Benevides, karta hato’o ona ba sekretária meza PN”, Xefe bankada PD, Manuel Noronha, informa iha resintu PN, (19/02/2025).
Iha fatin hanesan, Xefe Bankada Kongresu Nasionál Rekonstrusaun Timorense (CNRT, sigla portugés), Duarte Nunes, hateten bankada Governu CNRT ho PD aprezenta ona kandidatu pakote lista ida haruka ona ba meza PN, kandidatu ba área jurídiku husi PD no mídia nian mak husi CNRT.
Nia dehan, ho mudansa ne’e, bankada CNRT sei toka-fali iha enkontru lider bankada.
Tuir ajenda iha 24 Fevereiru PN sei realiza eleisaun hili reprezentante PN ba KI, maibé adia ba tempu seluk.
Lei Komunikasaun Sosiál artigu 45 ko’alia kona-ba kompozisaun KI mak ema-na’in lima hili tuir dalan:
- Reprezentante jornalista na’in-rua, ne’ebé jornalista sira mak hili liuhusi eleisaun
- Reprezentante órgaun komunikasaun sosiál ida, ne’ebé órgaun komunikasaun sosiál mak hili liuhusi eleisaun
- Sidadaun na’in-rua, ida ho kapasidade profisionál ba área komunikasaun sosiál, no ida seluk nu’udar jurista, hili husi PN
- Entre membru sira sei hili ema ida nu’udar sira-nia Prezidente
Artigu 46 ko’alia konaba mandatu, mak durasaun tinan haat, ne’ebé sei bele renova dala ida de’it.
Ho atribuisaun lei ne’e, Konsellu Imprensa realiza ona eleisaun ba jornalista sira hodi hili sira-nian reprezentante mak Cesar Mali no Joaquim Coutinho. Enkuantu, reprezentante orgaun komunikasaun sosiál mak Suzana Cardoso.
Notísia relevante: Conselho de Imprensa husu PPN prepara kandidatu reprezentante PN ba CI
Jornalista : Nelson de Sousa
Editora : Rita Almeida
