DILI, 17 Marsu 2025 (TATOLI)—Federasaun Futeból Timor-Leste (FFTL) realiza formasaun ‘Match Commissioners’ ba formandu hamutuk na’in-41, hodi nune’e bele hetan lisensa atu dirije kompetisaun jogu iha nivél nasionál no munisipál.
Formasaun ne’e hala’o durante semana ida hahú loron 17-20 fulan-Marsu tinan 2025 no formadór mai husi Asian Football Confederation (AFC).
Iha abertura ne’e, Prezidente FFTL, Nilton Telmo Gusmão dos Santos, husu ba formandu sira atu aproveita oportunidade ne’e ho di’ak atu aumenta bele hasa’e liután koñesimentu no abilidade ida-idak nian.
“Formasaun ne’e apoiu másimu husi FFTL, ne’eduni ita sei hala’o ita-nia formasaun ne’e espesiál ba ‘Match Commissioners’ nian. Ita hatene katak ita-nia ‘Match Commissioners’ sira hotu durante ne’e dirije jogu seidauk iha sertifikadu, entaun ba oin ‘Match Commissioners’ sira tenke iha hotu sertifikadu mak foin dirije jogu. Imi hotu tenke aproveita ho di’ak, atu nune’e bele hetan sertifikadu,” Nilton hateten iha nia intervensaun liuhusi video zoom iha Salaun Xanana Sport Centre, Dili, segunda ne’e.
Nilton dehan, oportunidade ne’e hanesan osan-mean ida ba formandu sira, ho nune’e tenke aproveita ho di’ak atu bele liu iha formasaun referidu.
“Sertifikadu la’ós atu prienxe imi-nia kritéria de’it, maibé sertifikadu atu ezije mós imi-nia responsabilidade atu nune’e ita bele hamutuk hodi dezenvolve ita-nia futeból,” nia dehan.
Formasaun ne’e, formandu sira mai husi Asosiasaun Futeból Munisípiu (AFM) iha munisípiu 13 inklui Dili nian rua hanesan Dili Leste no Dili Oeste.
Jornalista : Hortencio Sanchez
Editór : Cancio Ximenes
