DILI, 01 Abríl 2025 (TATOLI)—Inspetór Jerál Jogu (IGJ-sigla portugés) iha Ministériu Komérsiu no Indústria, Anibal C. Martins, hateten iha Janeiru-Fevereiru tinan ne’e, Inspesaun Jerál konsege arrekada reseita liu rihun $600 ba kofre Estadu.
“Iha trimestre dahuluk tinan 2025, Inspesaun Jerál Jogu rekolla taxa ba jogu ho valór $655.355,68, maibé ami hein katak rekolla barak liután ne’e iha tinan oin,” Anibal C. Martins, ba TATOLI, iha nia kna’ar fatin, tersa ne’e.
Responsável ne’e hatutan katak Inspesaun Jeral Jogu rekolla taxa liuhosi kontrola jogu sira hanesan Toto Bola, Slot Machine, jogu online no sorteiu sira.
Inspetór ne’e subliña, ekipa IGJ kontrola jogu sira no rekolla taxa ho manuál, tanba ne’e sira hakarak kria sistema dijitál ba rekollamentu taxa iha futuru.
“Ami-nia funsionáriu sira rekolla taxa ho manuál de’it, entaun ami sei estabelese sistema dijitalizasaun ne’e atu monitoriza iha futuru, tanba tipu jogu sira-ne’e iha lisensa,” Anibal haktuir.
Antes ne’e, iha tinan 2024, Ministériu Komérsiu no Indústria (MCI-sigla portugés), liuhusi Inspesaun Jerál Jogu, arrekada reseita husi jogu lísitu no jogu tradisionál bola guling hamutuk $3,917,821.91 ba kofre Estadu, kompara ho $3.723.446,70 iha 2023.
Jornalista: Felicidade Ximenes
Editór: Xisto Freitas da Piedade
