DILI, 16 Abríl 2025 (TATOLI)—Xefe Ezekutivu Revolta Alta Graça (RAG), Sander Maria Almeida da Costa Srerano, kuarta ne’e, hasoru malu ho Prezidente Repúblika José Ramos Horta hodi informa katak iha fulan-Agostu tinan ne’e, sei realiza eventu Boxe internasionál iha Dili.
“Ami mai ko’alia ho Prezidente Repúblika relasiona ho eventu ne’ebé ami sei hala’o iha Dili, eventu Boxe internasionál ian. Iha eventu ne’e, ami sei lori atleta balun mai husi Indonézia hodi kompete ho Boxe timoroan sira no ami sei lobi hela oinsá atu lori Boxista sira husi Filipina mai kompete hotu,” Sander hateten ba jornalista sira hafoin remata reuniaun ho Prezidente Repúblika, José Ramos Horta, hafoin enkontru iha Palásiu Prezidensiál Nicolau Lobato, Baurru Pite.
Nia dehan, daudaun ne’e preparasaun to’o ona 50% no fiar katak to’o fulan-Agostu ne’e preparasaun hotu bele atinje ona 100%.
“Ita-nia preparasaun agora to’o ona 50% ona, ita haree tempu sei dook, fiar katak to’o fulan-Agostu buat hotu bele la’o 100%. Eventu ne’e ami sei halo iha kategoria rua, kategoria ida mak amatir, ida mak profisionál Boxe,” nia tenik.
Dadaun ne’e, RAG kolabora ona ho Federasaun Boxe Amadora Timor-Leste (FBATL) hodi fó apoiu iha parte tékniku nian, atu nune’e eventu bele la’o ho susesu.
“Ami kontaktu ona ho sira federasaun Boxe, tanba sira mak hatene liu kona-ba Boxe entaun ita presiza sira atu servisu hamutuk ho ita no ita bele hatene klean liutan kona-ba nia lalaok ne’e oinsa,” nia dehan.
Xefe Ezekutivu ne’e hatutan, objetivu lolos husi atividade ne’e atu fó oportunidade ba timoroan sira ne’ebé involve iha mundu Boxe atu bele promove nafatin sira nia talentu.
“Ami hala’o atividade ne’e tanba haree ba ita-nia atleta barak mak iha talentu ba Boxe, entaun ita realiza atividade ne’e atu promove nafatin sir- nia talent. Tanba, eventu barak sempre halo iha rai-li’ur, entaun agora ita hala’o iha ita-nia rai-laran, atu promove nafatin sira-nia talent. Nune’e konvida fali ema husi rai-li’ur atu mai kompete iha ita-nia nasaun,” nia afirma.
Fatin ba eventu ne’e ekipa haree ona sei ko’alia ho Ministériu Juventude Desportu Arte no Kultura (MJDAK) hodi realiza iha Jináziu Dili, tanba infraestrutura báziku atu realiza eventu Boxe iha Timor-Leste só Jináziu Dili de’it.
Enkuantu kona-ba orsamentu atu realiza eventu ne’e, RAG iha ona kontaktu ho patrosinadór lubuk ida mak sei apoiu no sira seidauk bele fó sai montante orsamentu hira.
Durante enkontru ho Xefe estadu, José Ramos Hortam fó apoiu másimu tebes ba inisiativa di’ak ne’ebé joven timoroan hirak ne’e hala’o, hanesan parte ida hodi kontribui ba dezenvolvimentu no promove mós Timor-Leste ba mundu.
Jornalista : Hortencio Sanchez
Editór : Cancio Ximenes
