DILI, 16 Abríl 2025 (TATOLI)-Vise-Primeiru Ministru no Ministru Koordenadór asuntu Sosiál no Ministru Dezenvolvimentu Rurál no Abitasaun Komunitáriu, Mariano Assanami Sabino, husu ba Institutu Siénsia Saúde (ICS, sigla portugés) atu hala’o misaun no funsaun másimu atu bele forma estudante sai profisionál.
“ICS nu’udar institutu ida ne’ebé mak fó formasaun ba parteira, enfermeira no ita presiza tebes atu haree ida-ne’e, nune’e ohin mai vizita atu fó mensajen ba ita-nia institutu sira hotu atu hala’o nia misaun no funsaun ho másimu atu bele forma ita-nia ema no ita-nia oan sira atu sai profisionál iha dedikasaun, determinasaun, disiplina no mós sai ajente ba transformasaun ba mudansa ne’e presiza tebes-tebes”, dehan Assanami hafoin vizita ICS, kuarta ne’e.
Tuir nia, nasaun atu avansadu ne’e determina husi universidade sira. Universidade la’ós fabrika ida ne’ebé atu prodús ema profesionál, universidade iha misaun importante mak adere-an ba visaun Estadu, adere-an atu dudu nasaun ne’e oin. Tanba niversidade mak sai laboratóriu ne’ebé atu hamosu alternativu, peskiza no hanoin ne’ebé foun sira atu fó iklima ba ambiente polítiku iha ambitu teknolojia, indústria, komérsiu no agrikultura.
“Tanba ne’e mak nafatin husu ba sivita akadémiku esforsu nafatin, ba parte hotu-hotu tenke esforsu. Estudante sira estuda tanba imi nu’udar segmentu importante ida husi prosesu konstrusaun Estadu, segmentu importante ida ba nasaun, tanba ne’e nafatin esforsu luta no kadi kakutak hodi kontribui ba dezenvolvimentu nasaun”, nia enkoraja.
Nia hatutan, foin lalais Governu hasai rezolusaun ba suspensaun loke kursu foun ne’e, atu regula no bele haree liután atu universidade sira labele loke kursu ne’ebé barak no hanesan.
“Tanba iha kursu ne’ebé mak hanesan ne’e barak liu, liu-liu kursu siénsia sosiál, ne’e barak tebes, entaun Governu hasai rezolusaun ida atu ita haree didi’ak para fokus no konsentra liuba kursu sira ne’ebé seidauk iha, tanba universidade tenke han malu ho planu estratéjiku dezenvolvimentu nasionál, han-malu ho interese Estadu, para sai ajente iha prosesu dezenvolvimentu, no mós ajente ba kreativu inovativu no ajente ba kakutak nia”, nia informa.
Reitór ICS, Leão Borges, agradese ba prezensa Governu nia liuhusi Vise-PM, tanba bele mai vizita hodi haree besik liután infraestrutura, rekursu umanu, ne’ebé iha ICS, nune’e ho kondisaun mínimu ne’ebé iha bele sai ona kritériu ba akreditasaun institusionál ne’ebé ANAAA sei mai halo avaliasaun ba segunda-faze ninia.
“Universidade nafatin esforsu hodi tulun no forma estudante sira ho profesionál atu kontribui ba dezenvolvimentu iha ita-nia nasaun. Nune’e mós husu ba estudante sira oinsá mak bele estuda maka’as nune’e bele marka istória foun tanba agora uza teknolojia ne’ebé mak modernu entaun dosente estudante tenke hakaas-an buka nafatin para hariku sira-nia an husi siénsia no mós ho teknolojia ne’ebé iha”, tenik.
Notísia relevante: ICS prepara rekursu atu hadi’a kualidade saúde iha TL
Jornalista : Osória Marques
Editora : Rita Almeida
