DILI, 17 Abríl 2025 (TATOLI)–Sekretáriu Jerál Federasaun Karate-do Timor-Leste (FKTL), António Carlos de Araujo, hateten semana oin federasaun sei realiza kampionatu nasionál durante loron tolu hahú 25-27 Abríl 2025 hodi prepara atleta ba jogu rejionál SEA Games ne’ebé sei akontese Dezembru iha Tailándia.
“Ita hetan apoiu orsamentu husi Governu hodi hala’o kampionatu nasionál ne’e, ita hala’o eventu ne’e atu nune’e prepara ita-nia atleta sira ba jogu SEA Games,” Sekretáriu Jerál ne’e hateten ba Agência TATOLI iha Jináziu Dili, kinta ne’e.
Nia dehan, orsamentu ne’ebé apoiu husi Governu la sufisente entaun Munisípiu balun sei la partisipa.
“Ita haree ba orsamentu ne’ebé la sufisiente atu konvida Munisípiu hotu, entaun ami konvida de’it mak Lautéin, Vikeke, Aileu, Bobonaru, RAEOA, Dili fahe ba rua A no B ho mós ekipa selesaun nasionál balun mós sei kompete,” nia dehan.
Entretantu, iha atividade ne’e Munisípiu ne’ebé kompete sei mai ho atleta na’in-hitu (7) no treinadór na’in-ida (1) no ofisiál na’in-ida (1).
“Ita hetan apoiu orsamentu husi Ministériu Juventude Desportu (MJDAK) hamutuk $15.000, orsamentu ne’e mak ami sei kobre ba atividade hotu, fatin ita sei hala’o iha Komoro edifisiu Ministériu Kombatente Libertasaun Nasionál (MKLN),” nia hateten.
Enkuantu kona-ba prémiu ba manán na’in sira sei hetan medalla no osan. Ba primeiru lugar sei simu medalla ho osan hamutuk $300, segundu lugar $250 no terseiru lugar $100.
Jornalista : Hortencio Sanchez
Editór : Cancio Ximenes
