DILI, 17 Abríl 2025 (TATOLI)—Deputadu membru Komisaun B iha Parlamentu Nasionál (PN) ne’ebé trata asuntu Negósiu Estranjeiru, Defeza no Seguransa, Natalino dos Santos, apela ba joven timoroan hotu atu kontinua kria situasaun pás iha ámbitu selebrasaun loron Páskua.
“Páskua ne’e loron boot, sarani Katólika ne’ebé komemora universalmente espesialmente ba ita kristaun Katólika, ita sempre selebra tuir ritmu ne’ebé iha ita nu’udar timoroan ne’ebé bele konsidera relijiaun Katólika ne’e hanesan identidade ita-nia,” Deputadu Natalino hato’o iha resintu PN, kinta ne’e.
Notísia relevante : Komandu PNTL garante seguransa iha selebrasaun Santa-Páskua
Nia konsidera, Páskua hanesan tempu ba sarani sira atu halo reflesaun ba moris.
“Tanba ne’e, husu ba timoroan hotu atu hakmatek hodi komemora loron ne’ebé importante ba ema Kristaun,” nia apela.
Membru komisaun B ne’e hakarak hato’o ba Polísia Nasionál Timor-Leste (PNTL) atubele asegura seguransa iha loron ida-ne’e iha fatin-fatin hodi sarani sira bele selebra loron ne’e ho di’ak.
“Liuliu iha fatin sira ne’ebé ita identifika risku presiza Polísia intensivamente halo patrulla no kontrola iha ne’ebá,” nia katak.
Deputadu Bankada CNRT ne’e dehan, membru Polísia la presiza haree selebrasaun loron importante sira, maibé sempre iha oras 24 halo atendimentu no patrullamentu iha fatin sira ne’ebé risku atubele fó seguransa ba populasaun sira-nia movimentu. PNTL mós presiza servisu atu mantein ordem no lei.
Jornalista : Nelson de Sousa
Editora : Julia Chatarina
