AILEU, 29 Abríl 2025 (TATOLI) – Kondisaun estrada grave, Komunidade no autoridade Suku Lekitura, Postu administrativu Aileu vila, Munisípiu Aileu sente preokupadu.
Xefi Suku Lekitrua, Alarico Almeida informa Komunidade Suku Lekitura preokupa ho kondisaun estrada ligasaun Suku Lekitura ba Merkadu Munisípiu Aileu tanba kondisaun estrada ne’ebé aat grave no difikulta transporta produtu ortikultura komunidade sira-nian hodi asesu ba merkadu sira.
“Sasan barak ne’ebé husi aldeia ne rasik iha maibé kewalahan tanba Estrada, entaun durante ne’e produsaun mós sira halo menus. Maibé, nafatin ita esforsu atu nune’e ninia kontinuasaun liuhusi atividade sira hanesan nune’e. Bele, nai-ulun sira haree diretamente atu tau atensaun ba iha Estrada hodi nune’e fasil ba komunidade atu bele asesu”, autoridade ne’e hateten.
Iha fatin hanesan, Komunidade Suku Lekitura Mouzinho de Almeida relata, estrada ne’e sai hanesan prekupasaun ida no kompara kondisaun entre aldeia no área remota sira katak se aldeia mak grave ona oinsá ho área remota sira ne’e.
“Ami aldeia ida-ne’ebé ema bolu katak Muito Remota. Remota tebes depois ami-nia produsaun sira impaktu mós ba Estrada. Bailoron karreta bele tuun mai no ami leba mós bele, maibé to’o udan karreta mós labele tuun no motor mós labele tuun mai ami-nia área,” komunidade ne’e hato’o.
Entretantu, Komunidade iha Suku Lekitura maioria moris ho vida agrikultura espesiál liu iha área ortikultura nian no Suku Lekitura rasik iha aldeia haat hanesan Aldeia Raerema, Riheun, Erluli no Lekitura.
Jornalista : Francisco Sony
Editór : Rafael Ximenes de A. Belo
