DILI, 13 Maiu 2025 (TATOLI)-Sentru Aprendizajen no Formasaun Eskolár (CAFE) Dili, tersa ne’e selebra misa hodi fó omenajen no onra ba Nossa Senhora de Fátima. Iha misa ne’e partisipa hosi estudante eskola CAFE inklui komunidade edukativa.
“Selebrasaun ne’e la’ós de’it hanesan tradisaun relijioza ida, ne’e hanesan atividade anuál ida ne’ebé akontese iha loron 13 Maiu. Ho ida-ne’e ita hanoin atu reforsa valór sira solidariedade, haraik-an no respeitu entre labarik sira, profesór sira no inan-aman sira”, Koordenadór Interinu CAFE Dili, Justino Ximenes, dehan ba jornalista sira iha eskola CAFE, Taibesi.
Justino Ximenes dehan hili Nossa Senhora de Fátima nu’udar padroeira ba estabelesimentu ensinu ne’e iha ligasaun ho mensajen ne’ebé orijinalmente dirije ba labarik sira, hanesan serbisu edukativu ne’ebé dezenvolve hosi CAFE iha Dili.
“Ami serbisu ho labarik sira, hanesan mós aparisaun dahuluk Nossa Senhora de Fátima nian ba bibi-atan ki’ik na’in tolu. Tanba ne’e, ami sente ligasaun espirituál no edukativu ida ho mensajen Fátima nian”, hatete nia.
Momentu ida ne’ebé memorável liu, tuir ema sira ne’ebé marka prezensa, maka dramatizasaun ba aparisaun Nossa Senhora de Fátima nian, ne’ebé hala’o hosi estudante sira.
Totál estudante asesu eskola CAFE Dili hamutuk 1.649 iha nível ensinu oioin. No iha profesór hamutuk 73, portugés na’in 19 no timoroan na’in 54.
Notísia relevante: Fulan-maiu: “Halo komunikasaun ho Maria, halo komunikasaun ho moris”
Jornalista : Osória Marques
Editora : Rita Almeida
