OEKUSI, 16 Maiu 2025 (TATOLI) –Sekretária Rejionál ba Asuntu Agrikultura, Filomena Sila, hamutuk ho natar na’in-92, sesta ne’e, kolleta hare membramo ektare 24 iha área natar Barasantu suku Lalisuk, sub-rejiaun Pante Makasar, Rejiaun Administrativa Espesiál Oekusi Ambeno (RAEOA).
Notísia relevante:PA RAEOA lansa adubu orgánika hasa’e produsaun no hamate Lakataru
Iha biban ne’e, Filomena Sila, apresia ho esforsa agrikultór sira na’in-92 iha natar referidu, tanba autoridade RAEOA liuhusi agrikultura oferese apoia adubu no mákina, iha duni rezultadu.
“Durante ne’e, Autoridade RAEOA liuhusi ami-nia servisu apoiu ita bo’ot sira, hahú husi fila rai, apoia adubu organiku AMO, ohin ami mai, ita hamutuk kolleta nia rezultadu, parabens ba inan-aman sira, tanba imi-nia esforsa ho kbi’it tomak, ohin bele hetan rezultadu ida di’ak ba ita-nia moris loron-loron,” Filomena Sila, espresa nia sentimentu ksolok, iha ámbitu seremónia kolleta ne’e.
Dirijente Agrikultura Oekusi ne’e, esplika natar ektare 24, durante ne’e aplika adubu organiku AMO, fó duni benefisíu tanba hasa’e produsaun hare tonelada 3,2 kada ektare, kompara ho tinan kotuk seidauk aplika, hetan de’it tonelada 2,5 kada ektare.
Tanba ne’e, nia fó hanoin ba agrikultór sira iha suku Lalisuk, liuliu natar na’in-sira iha Barasantu, presiza servisu hamutuk ho Autoridade RAEOA no labele abandona natar sira, tanba Autoridade prontu atu apoia tan iha futuru.
“Ohin ita kolleta daudaun, aban ba oin bele haree fatin ne’e, karik bee sei sufisiénte, bele kontinua halai tan, ou bele kuda fali modo, pateka, forremunggu, tomate no ai-han seluk tan, atu rai ka natar sira-ne’e labele abandona,” nia apela.
Notísia relevante:Autoridade RAEOA rega adubu orgániku ba natar ektare 77 iha Naktuka
Iha fatin hanesan, Xefe Aldeia Manuimpena Suku Lalisuk, Herkolanu Casenube, agradese tanba autoridade RAEOA liuhusi Sekretária Rejionál Agrikultura, durante ne’e apoia natar na’in-sira hahú husi faze inisíu to’o kolleta.
“Ha’u hanesan autoridade lokál, lori natar na’in-sira, hakarak hato’o agradese ba Autoridade RAEOA liuliu servisu agrikultura, tanba durante ne’e servisu maka’as no apoia natar na’in-sira mak to’o ohin ita kolleta, ami agradese tanba kuandu hare sira foin hetan isin, hetan atakasaun barak husi peste, maibé ho ita-bo’ot sira-nia tulun, konsege salve ita-nia ai-han sira-ne’e, ami husu atu tau matan nafatin mai ami,” nia orgullu.
Entertantu, Natar na’in, Joaquin de Almeida, rekomenda ba autoridade RAEOA liuhusi Sekretária Rejionál Agrikultura, atu nafatin prevee orsamentu hodi sosa tan adubu organiku Ako’y Magsasakang Organiku (AMO), tanba natar Barasantu aplika adubu referidu, hatudu rezultadu di’ak.
Notísia relevante:Autoridade RAEOA sosa adubu orgániku AMO hodi hasa’e produsaun agríkola
Jornalista: Abílio Elo Nini
Editór: Florencio Miranda Ximenes
