ERMERA, 20 Maiu 2025 (TATOLI) – Líder komunitáriu no veteranu sira, iha Suku Katrai-Kraik, Postu Administrativu Letefoho, Munisípiu Ermera, husu ba entidade hotu atu hamutuk fó apoiu ba kompañia China Civil Engineering Construction Corporation (CCECC) atu ke’e fatuk iha suku referidu hodi kontribui ba reabilitasaun estrada lokál.
Ejijénsia ne’e hato’o hodi responde ba grupu estudante Movimentu Tane Aa’s Lian Suku Katrai-Kraik, ne’ebé halo konferénsia imprensa, iha loron 08 fulan ne’e, iha Dili, hodi husu ba líder komunitáriu no Konsellu Suku atu analiza didi’ak kontratu ne’ebé selebra ona ho kompañia CCECC hodi permite empreza xineza ne’e ke’e fatuk iha área Asdan hodi utiliza ba prosesu kontrusaun estrada husi Postu Administrativu Fatubuilico, Munisípiu Ainaro, liga ba Postu Adminsitrativu Latefeho.
Xefe Suku Katrai-Kraik, Carlos da Conceição Soares, husu ba CCECC hodi kontinua hala’o sira nia servisu, tanba povu presiza dezenvolvimentu.
“Liu husi ne’e, ha’u hakarak fó hanoin balu, liu husi Tatoli katak liga ba konferénsia sira [estudante] ni’an, iha dia 08 Maiu liu ba, iha Dili. Tanba ne’e, ohin ami hotu-hotu iha ne’e, autoridade lokál, hamutuk ho veteranu sira, xefe aldeia sira, Amo pároku no Administradór Postu Administrativu Letefoho, inklui membru Konsellu Suku, ami nafatin sujere ba alin estudante sira katak mai ita hotu servisu hamutuk hodi halo dezenvolvimentu iha ita-nia suku”, nia informa ba Tatoli, iha Letefoho.
Carlos Soares apela ba estudante sira, bainhira la satisfaz ho buat ruma ka iha diverjénsia hanoin, la presija halo konferénsia imprensa, liu husi média sosiál oioin. “Solusaun di’ak liu mak mai ita hasoru malu atu nune’e bele fó esplikasaun ba malu karik iha dezentedimentu entre ita”, nia sujere.
Ideia hanesan transmite mós husi Koordenadór Veteranu, zona La Hili, Postu Administrativu Letefoho, João Felisberto de Deus “Bibi Malae”. Nia considera katak reabilitasaun estrada iha Suku Catrai-Craic hanesan dezenvolvimentu ida ne’ebé di’ak tebes, tanba lori benifísiu ba povu ne’ebé durante tinan 24 funu iha ai-laran hakarak goza dezenvolvimentu iha tempu ukun-aan.
“Ami veteranu apoia nafatin atu kompañia kontinua hala’o nia servisu too kontratu termina, ida ne’e mak ami nia luta hodi lori dezenvolvimentu ba povu”, nia hatete.
João de Deus la aseita jerasaun foun sira ne’ebé foin ba eskola matenek hodi foti asaun impede dezenvolvimentu.
Nune’e mós Sekretáriu Nureb iha tempu rezisténsia, Luís Madeira de Deus, hatete povu iha suku referidu hakarak dezenvolvimentu no la permite kualkér grupu ida impede reabilitasaun estrada ne’ebé sei lori benifísiu ba komunidade hodi lori sira nia produtu asesu ba merkadu.
“Se de’it ba impede dezenvolvimentu, polísia sei kaptura, tanba impede ema hotu-hotu nia hakarak no halerik ba dezenvolvimentu, tanba grupu ida-nia hahalok halo povu kontinua terus no halerik nafatin ba moris di’ak”, nia lamenta.
Partisipa iha reuniaun ne’e, entre sira seluk, Amo Pároku Letefeho, Pe. Élio Pereira Fernandes, Adminsitradór Postu Administrativu Letefoho, Vicente Maria de Deus, no Membru Konsellu Suku.
Lembra katak, iha loron 08 fulan maiu ne’e, Movimentu Tane Aa’s Lian Katrai-Kraik, realiza konferénsia, iha Dili, husu ba líder komunitáriu atu kansela selebrasaun akordu entre komunidade aldeia Baulisuria ho Maukoliria ho kompañia CCECC hodi ke’e fatuk iha área Asdan hodi utiliza ba projetu reabilitasaun estrada husi Postu Administrativu Hatubuiliko, Munisípiu Ainaro ba Letefoho.
Tuir komunikadu ne’ebé Tatoli asesu, Movimentu Tane Aa’s Lian Katrai-Kraik konsidera “selebrasaun kontratu ne’e laiha koerénsia no inkostitusionál, tanba la responde ba nesesidade komunidade ni’an no akordu ne’e laiha fundamentu ne’ebé klaru”.
Jornalista: Afonso do Rosário
Editora: Isaura Lemos de Deus
