DILI, 27 Maiu 2025 (TATOLI)–Diretór Nasionál ba ema ho defisiénsia iha Ministériu Solidariedade Sosiál no Inkluzaun (MSSI), Domingos Hendriques Maia, hatete governu ajuda ona ema ho defisiénsia ne’ebé vulneravel hamutuk 30 hodi halo negósiu iha área oinoin.
“Tinan ne’e ho nia orsametu ba sira, ministériu tau osan $26.750”, Domingos Maia dehan ba TATOLI iha nia knaar fatin Kaikoli, tersa ne’e.
Nia haktuir ema-30 ne’ebé simu apoiu, maioria loke kioske, na’in tolu loke offisina, ida loke loja hadi’a telefone, ida loke karpintaria, ida fali prodús tahu-tempe.
Programa ida-ne’e atu hasa’e sira-nia rendimentu. Nune’e, benefisiáriu 30 maihusi Kovalima na’in-tolu, Likisá na’in-neen, Dili iha ida, Baukau iha haat, Manufahi na’in-tolu, Bobonaru iha na’in-tolu, Oekusi na’in-haat, Ataúru iha na’in-tolu ho Manatutu iha na’in-tolu.
Maia dehan ema-na’in 30 nu’udar etapa dahuluk husi 17.061 ne’ebé parte governu oferese. Tinan 2024 MSSI apoiu ema na’in-rua, ida iha Aileu no ida iha Baukau. Ida Aileu MSSI mak loke kios no konstruiu fatin negósiu, tau sasan pois faan. Ida Baukau ninia negósiu iha ona, faan iha dalan ninin entaun MSSI aumenta tan osan para reforsa ninia negósiu.
Osan ne’ebé MSSI oferese ba benefisiáriu sira mak husi $200 até $2.000. Rekezitu asesu ba apoiu pontuál mak kondisaun hela-fatin, rendimentu lorloron nian no ikus liu mak laiha liu rendimentu ba nesesidade uma-laran.
“Ida $200 ne’e ba apoiu pontuál imediata ne’e hodi sosa sira-nia nesesidade loron-loron, pelumenus atente ba nesesidade semana ida nian ka loron lima nian. Apoiu ida-ne’e ba tempu badak nia laran no apoiu ne’e ita entrega imediata ba maluk defisiénsia sira. Depois ida $2.000 ne’e ita fó ba sira halo negósiu nian, sustentabilidade moris loron-loron ba tinan naruk nian, nune’e labele moris dependente ho familia”, nia esplika.
Orsamentu Jerál Estadu (OJE) 2025 ba MSSI prevee $26,188.602, hodi kontinua fó prioridade ba programa serbisu no atendimentu sosiál ba povu.
“OJE 2025 ami-nian $26.188.602 hodi aloka ba saláriu vensimentu $3,982,088, beins no serbisu $10,744,951, transferénsia públika $9,501,672, kapitál menór rihun $500 no kapitál dezenvolvimentu $1,459,891”, dehan ministra, Verónica das Dores, antes ne’e iha Parlamentu Nasionál hafoin audénsia ho komisaun C-PN.
Nia dehan programa prioridade dezenvolvimentu instituisionál no serbisu no atendimentu social.
Notísia relevante: MSSI kontinua prioriza programa atendimentu sosiál iha OJE 2025
Jornalista : Osória Marques
Editora : Rita Almeida
