MSSI kontinua prioriza programa atendimentu sosiál iha OJE 2025
DILI, 22 outubru 2024 (TATOLI)—Ministériu Solidariedade Sosiál no Inkluzaun (MSSI) prevee $26,188.602 iha proposta Orsamentu Jerál Estadu (OJE) 2025 hodi kontinua fó prioridade ba programa serbisu no atendimentu sosiál ba povu.
“OJE 2025 ami-nian $26.188.602 hodi aloka ba saláriu vensimentu $3,982,088, beins no serbisu $10,744,951, transferénsia públika $9,501,672, kapitál menór rihun $500 no kapitál dezenvolvimentu $1,459,891. Ami iha programa prioridade rua mak ida (1) dezenvolvimentu instituisionál no rua (2) serbisu no atendimentu sosiál,” Ministra Solidariedade Sosiál no Inkluzaun (MSSI), Verónica das Dores, hateten ba jornalista sira hafoin audiénsia ho komisaun C trata asuntu Finansa Públika iha Parlamentu Nasionál (PN), tersa ne’e.
Programa serbisu no atendimentu sosiál ida-ne’e importante tebes ne’ebé durante ne’e la’o hela no tinan oin kontinua nafatin liuliu esensiál liu haree ba família vulnerável sira hanesan idózu, inan afeta problema entermu familiár no violénsia bazeia ba jéneru.
Aleinde ne’e, nia dehan, tau atensaun mós ba violénsia hasoru menoridade sira no apoiu uma mahon sira tanba sira mak Governu nia liman no ain ne’ebé tau matan hela ba família vulnerável sira.
Durante audiénsia, MSSI relata mós ezekusaun OJE 2024 nian ne’ebé atinji ona 73.18%.
Tuir dokumentu livru proposta OJE 2025 Planu Asaun Anuál Serbisu no Entidade Setór Públiku Administrativu, ba tinan oin MSSI iha programa prioridade rua (2) hanesan programa funsionamentu no dezenvolvimentu instituisional ho sub-programa haat (4) no atividade 28; Programa inkluzaun sosiál ho sub-programa 11 no atividade 36.
Jornalista : Nelson de Sousa
Editór : Cancio Ximenes
