DILI, 27 Maiu 2025 (TATOLI)–Prezidente Liga Futeból Timor-Leste (LFTL), Ipolito Soares, hateten jogu ba Segunda Divizaun sei prolonga ba loron 30 fulan-Maiu nune’e fó biban ba klube sira prepara jogadór no atu halo preparasaun másimu liu ba kompetisaun.
Notísia Relevante: Abertura liga futeból TL: SLB Laulara-Karketu Dili sei doko Estádiu Manatutu
“Segunda Divizaun foin lalais ita prolonga tan sira-nia rejistrasaun to’o iha loron 30 fulan-Maiu, atu nune’e sira bele prepara sira-nia lista jogadór, lista ofisiál no sira mós bele prepara másimu liu,” Ipolito hateten ba Agência Tatoli liuhusi programa “Entrevista Eskluziva” ho topiku “Espetativa Liga Timorense Ba Kompetisaun Jogu Ubternasionál” iha estúdiu, Faról, tersa ne’e.
Nia dehan, jogu ba Segunda Divizaun sei hala’o iha Dili no LFTL koordena ona ho Governu atu haree kampu balun iha Dili laran hodi realiza jogu.
“Jogu ba Segunda Divizaun ita sei hala’o iha Dili. Ita ko’alia ona ho Governu atu fó kampu Bekora mai ita utiliza ba jogu Segunda Divizaun nian,” nia dehan.
Daudaun ne’em klube Segunda Divizaun hamutuk hitu (7) mak hanesan Nagardjo FC, Lica-Lica Lemorai FC, Kablaki FC, FIEL FC, Santa Cruz FC, Aitana FC no Zebra FC.
Iha jogu ba Segunda Divizaun sei hala’o durante fulan ida, bainhira klube rua mak la konsege rekolla pontu boot sei tun husi Segunda Divizaun ba Terseira Divizaun.
Klube sira iha Segunda Divizaun sei hetan subsidiu $5,000 kada klube no prémiu ba kampiaun sei hetan $10.000.
Jornalista : Hortencio Sanchez
Editór : Cancio Ximenes
